*एस.ए.मिशन हायस्कूल व कनिष्ठ महाविद्यालयात 'मेंदू आरोग्य' व मानसिक आरोग्यावर जनजागृती कार्यशाळा संपन्न*
नंदुरबार(प्रतिनिधी):-येथील एस. ए. एम. ट्रस्ट संचलित एस. ए. मिशन हायस्कूल व कनिष्ठ महाविद्यालयात इयत्ता 11 वी व 12 वीच्या विद्यार्थ्यांसाठी, नंदुरबार जिल्हा रुग्णालय अंतर्गत मेंदू आरोग्य विभागाच्या वतीने विशेष आरोग्य तपासणी, आय.ई. सी. (IEC) सत्र आणि मानसिक आरोग्य जनजागृती कार्यक्रमाचे आयोजन करण्यात आले होते.​कार्यक्रमाच्या अध्यक्षस्थानी विद्यालयाच्या प्राचार्या सौ. नूतनवर्षा वळवी होत्या. तर प्रमुख अतिथी म्हणून उपमुख्याध्यापक श्री. विजय पवार, पर्यवेक्षक श्री. मनीष पाडवी आणि पर्यवेक्षिका सौ. प्रतीक्षा वळवी उपस्थित होते.
​याप्रसंगी जिल्हा रुग्णालय अंतर्गत मेंदू आरोग्य विभागाचे डॉक्टर व कर्मचारी उपस्थित होते. प्रमुख मार्गदर्शक म्हणून प्रवीण डोंगरे (जिल्हा चिकित्सक मानसशास्त्रज्ञ) आणि सौ. पूजा शर्मा (समुपदेशक) यांनी विद्यार्थ्यांना मानसिक आरोग्याचे महत्त्व, दैनंदिन जीवनातील ताणतणाव व्यवस्थापन आणि आत्महत्या प्रतिबंधात्मक समुपदेशनावर सविस्तर व मोलाचे मार्गदर्शन केले. या सत्रादरम्यान विद्यार्थ्यांनी विचारलेल्या विविध शंका व प्रश्नांना त्यांनी अत्यंत समर्पक व समाधानकारक उत्तरे दिली.
​अध्यक्षीय मनोगतात प्राचार्या सौ. नूतनवर्षा वळवी यांनी सांगितले की, "शारीरिक आरोग्याइतकेच मानसिक आरोग्यही महत्त्वाचे असून विद्यार्थ्यांनी अभ्यासाचा किंवा इतर कोणताही ताण न घेता सकारात्मक विचारसरणी बाळगावी."
​कार्यक्रमाचे सूत्रसंचालन आणि आभार प्रदर्शन सुनीता कुंवर यांनी केले. या कार्यक्रमास जिल्हा रुग्णालयाचे कर्मचारी, कनिष्ठ महाविद्यालयातील शिक्षक, शिक्षिका तसेच विद्यार्थी मोठ्या संख्येने उपस्थित होते.