*नंदुरबारमध्ये ‘महाकुंभ पंडित दीनदयाल उपाध्याय रोजगार मेळावा’संपन्न 175 तरुणांची अंतिम निवड 2 हजार 475 उमेदवारांचा सहभाग*
नंदुरबार(प्रतिनिधी):-देशाच्या युवा शक्तीला रोजगारक्षम बनविण्यासाठी शिक्षणासोबत कौशल्य विकास, प्रशिक्षण आणि रोजगार यांची सांगड घालणे आवश्यक आहे. केवळ पदवी मिळविणे पुरेसे नसून बदलत्या तंत्रज्ञानाच्या अनुषंगाने एआय, सेमीकंडक्टर, क्वांटम कॉम्प्युटिंग आदी क्षेत्रांतील कौशल्ये सातत्याने आत्मसात करून ‘अपस्किलिंग’ करणे ही काळाची गरज आहे. जगातील 28 हून अधिक देशांमध्ये कुशल मनुष्यबळाची मोठी मागणी आहे. महाराष्ट्रातील तरुणांना आंतरराष्ट्रीय स्तरावर रोजगाराच्या संधी उपलब्ध करून देण्यासाठी शासन प्रयत्नशील आहे, असे प्रतिपादन मुख्यमंत्री देवेंद्र फडणवीस यांनी केले. पंतप्रधान नरेंद्र मोदी यांच्या संविधानिक पदावरील सार्वजनिक जीवनाला 25 वर्षे पूर्ण झाल्यानिमित्त तसेच ‘सेवा संकल्प अभियाना ’अंतर्गत 17 सप्टेंबर ते 17 ऑक्टोबर 2026 या कालावधीत राज्यात ‘सेवा परमोधर्म’ व ‘सेवा संकल्प अभियान’ राबविण्यात येत आहे. या अभियानांतर्गत नंदुरबार जिल्ह्यात ‘महाकुंभ पंडित दीनदयाल उपाध्याय रोजगार मेळावा’ उत्साहात संपन्न झाला. जिल्ह्यात एकूण 9 ठिकाणी रोजगार मेळावे आयोजित करण्यात आले. या रोजगार मेळाव्यांना जिल्ह्यातील युवक-युवतींचा उत्स्फूर्त प्रतिसाद मिळाला. एकूण 2 हजार 475 उमेदवारांनी सहभाग नोंदविला. मेळाव्यात 71 उद्योजक सहभागी झाले असून 1 हजार 446 रिक्त पदे उपलब्ध करून देण्यात आली होती. त्यापैकी 1 हजार 47 उमेदवारांची प्राथमिक निवड, तर 175 उमेदवारांची अंतिम निवड करण्यात आली.
रोजगार मेळाव्याच्या माध्यमातून नंदुरबार जिल्ह्यातील युवकांना त्यांच्या कौशल्य व पात्रतेनुसार रोजगाराच्या संधी उपलब्ध झाल्या आहेत. अशी माहिती जिल्हा कौशल्य विकास, रोजगार व उद्योजकता मार्गदर्शन केंद्राचे प्रभारी सहाय्यक आयुक्त मंगेश वाघ यांनी शासकीय प्रसिद्धीपत्रकाद्वारे दिली.