*नंदुरबार येथे जिल्हास्तरीय शालेय रग्बी स्पर्धा संपन्न, एस.ए.मिशन हायस्कूलचे तिन्ही वयोगटांत वर्चस्व*
नंदुरबार(प्रतिनिधी):-येथील एस.ए.मिशन हायस्कूल व कनिष्ठ महाविद्यालयाच्या क्रीडांगणावर नुकत्याच जिल्हास्तरीय शालेय रग्बी स्पर्धा मोठ्या उत्साहात पार पडल्या. या स्पर्धेत जिल्ह्यातील विविध शाळांमधील 14, 17 आणि 19 वर्षांखालील मुला-मुलींच्या संघांनी उत्स्फूर्त सहभाग नोंदवला. अत्यंत चुरशीच्या आणि रंगतदार ठरलेल्या या स्पर्धेत यजमान एस. ए. मिशन हायस्कूलच्या मुलांच्या संघाने तिन्ही वयोगटांत तर तर 19 वर्षातील वयोगटात मुलींनी उत्कृष्ट कामगिरी करत प्रथम क्रमांक पटकावला आणि स्पर्धेवर आपले वर्चस्व सिद्ध केले.
अंतिम सामन्यांचा थरार,14 वर्षांखालील गट (मुले): अंतिम सामन्यात एस. ए. मिशन हायस्कूलने अत्यंत आक्रमक खेळ करत श्रॉफ हायस्कूलचा 2-0 अशा फरकाने पराभव केला.
17 वर्षांखालील गट (मुले): या गटातही मिशन हायस्कूलच्या खेळाडूंनी शानदार रणनीती आखत श्रॉफ हायस्कूलला 2-0 ने धूळ चारली.19 वर्षांखालील गट (मुले): अत्यंत चुरशीच्या ठरलेल्या अंतिम सामन्यात मिशन हायस्कूलच्या संघाने अँग्लो उर्दू हायस्कूलवर 1-0 अशी मात करत विजेतेपदावर मोहर उमटवली.
नाशिक विभागीय स्पर्धेसाठी निवड:
या जिल्हास्तरीय स्पर्धेत तिन्ही वयोगटांत अजिंक्यपद मिळवणारे एस. ए. मिशन हायस्कूलचे विजयी संघ आता नाशिक येथे आयोजित होणाऱ्या आगामी विभागीय शालेय रग्बी स्पर्धेत नंदुरबार जिल्ह्याचे प्रतिनिधित्व करणार आहेत.
विजेत्या खेळाडूंना प्रशिक्षक खुशाल शर्मा यांचे मोलाचे मार्गदर्शन लाभले. खेळाडूंच्या या दणदणीत यशाबद्दल संस्थेचे कार्यकारी संचालक डॉ. राजेश वळवी, चेअरमन मार्था अक्का सुतार आणि शाळेच्या प्राचार्या नूतनवर्षा वळवी यांनी सर्व खेळाडू व प्रशिक्षकांचे कौतुक केले आणि नाशिक येथील विभागीय स्पर्धेत उत्कृष्ट कामगिरीसाठी हार्दिक शुभेच्छा दिल्या. या यशामुळे शाळेच्या व क्रीडा वर्तुळातून विजयी खेळाडूंवर अभिनंदनाचा वर्षाव होत आहे.