*नंदुरबार जिल्ह्यातील 31 लघुपाटबंधारे प्रकल्पांचे सर्वंकष धरण सुरक्षा मूल्यांकन*
नंदुरबार(प्रतिनिधी):-नंदुरबार जिल्ह्यातील मृद व जलसंधारण विभागाच्या अखत्यारितील निर्दिष्ट धरणांचे धरण सुरक्षा कायदा, 2021 अंतर्गत सर्वंकष धरण सुरक्षा मूल्यांकन करण्याची कार्यवाही प्रगतीपथावर आहे. त्यानुषंगाने मुख्य अभियंता, मृद व जलसंधारण, छत्रपती संभाजीनगर हरिभाऊ गीते यांनी गठित केलेल्या तज्ज्ञ समितीमार्फत जिल्ह्यातील एकूण 31 लघुपाटबंधारे प्रकल्पांचे सर्वंकष धरण सुरक्षा मूल्यांकन करण्यात येणार आहे. अशी माहिती मृद व जलसंधारण विभागाचे कार्यकारी अभियंता सचिन वानरे यांनी एका प्रसिद्धी पत्रकान्वये दिली आहे. पहिल्या टप्प्यात नंदुरबार व नवापूर तालुक्यातील 15 लघुपाटबंधारे प्रकल्पांचे सर्वंकष धरण सुरक्षा मूल्यांकन 26 ते 28 सप्टेंबर 2026 या कालावधीत करण्यात आले. या समितीमध्ये प्रा. डॉ. संदीप मेश्राम, COEP Technological University, पुणे, कार्यकारी अभियंता, लघु पाटबंधारे जिल्हा परिषद, नंदुरबार, सागर भराडे, लघु पाटबंधारे जिल्हा परिषद,जळगाव उपअभियंता किरण उदमले, तसेच विश्वनाथ काटे यांचा समावेश आहे.
दुसऱ्या टप्प्यात शहादा, तळोदा, अक्कलकुवा व धडगाव तालुक्यातील 10 लघुपाटबंधारे प्रकल्पांचे सर्वंकष धरण सुरक्षा मूल्यांकन 10 ते 12 ऑक्टोबर 2026 या कालावधीत करण्यात येणार आहे. तसेच तिसऱ्या टप्प्यात उर्वरित 6 लघुपाटबंधारे प्रकल्पांचे सर्वंकष धरण सुरक्षा मूल्यांकन 29 ते 30 ऑक्टोबर 2026 या कालावधीत करण्यात येणार आहे. या सर्वंकष धरण सुरक्षा मूल्यांकनामध्ये धरणांची सद्यस्थिती, सुरक्षितता, संरचनात्मक बाबी तसेच आवश्यक तांत्रिक बाबींची सविस्तर तपासणी करण्यात येणार आहे. तसेच धरणांच्या सुरक्षिततेच्या दृष्टीने आवश्यक उपाययोजनांबाबत मार्गदर्शन करण्यात येणार आहे.