*पिंपळसोंडच्या" बोहाडा-सोंगी मुखवट्यांची कलेचे पुण्यात दिमाखदार प्रस्तुती, कलाकार शिवराम चौधरी यांच्या पारंपरिक कलेने वेधले रसिकांचे लक्ष*
सुरगाणा(प्रतिनिधी):-नाशिक जिल्ह्यातील सुरगाणा तालुक्याच्या आदिवासी लोककलेचा समृद्ध पारंपरिक अमूर्त कला,सांस्कृतिक वारसा सुगंध आता पुणे शहरातील
कलामंचावर  पर्यटकांना अनुभवायला मिळाला. महाराष्ट्र पर्यटन विकास महामंडळाच्या सहकार्याने बांगला नाटक डॉट कॉम यांच्या सहकार्याने "बंगाल महाराष्ट्र क्राॅप्ट शाॅपिंग ॲंड कल्चरल फेस्टिव्हल " क्राॅप्ट कथा या सांस्कृतिक महोत्सवात दिमाखदार सादरीकरण केले. पुणे येथे झालेल्या महोत्सवात शिवराम चौधरी या हस्तकला काराने हस्त कौशल्याने तयार केलेले रामायण,महाभारतातील कथेचे पात्रातील सोंगी मुखवटे यांच्या प्रतिकृती रमेश बागुल, मणिराम चौधरी यांनी प्रदर्शनात प्रदर्शित केल्या. क्राॅप्ट कथाच्या माध्यमातून  विविध राज्यांच्या हस्तकला, लोककला, सांस्कृतिक परंपरांना व्यासपीठ उपलब्ध झाले. कलाकार पारंपरिक कलेचे  जतन संवर्धन करीत ती कला  विविध ठिकाणच्या कला मंचापर्यत पोहचवत आहेत. पुण्या सारख्या मोठ्या शहरात सुरगाण्याच्या पारंपरिक आदिवासी कलेला सादरीकरणाची संधी मिळाली हे महत्त्वाचे पाऊल आहे. पिंपळसोंड येथील पारंपरिक कलाकार शिवराम चौधरी यांनी साकारलेल्या बोहाडा आणि सोंगी मुखवट्यांच्या कलेने पुणेकर रसिकांचे विशेष लक्ष वेधून घेतले.
आदिवासी समाजाच्या सांस्कृतिक जीवनात बोहाडा आणि सोंगी मुखवट्यांना विशेष स्थान आहे. पारंपरिक पद्धतीने तयार केले जाणारे हे मुखवटे केवळ कलाकृती नसून लोकपरंपरा, श्रद्धा, लोककथा आणि सांस्कृतिक स्मृती जपणारे माध्यम आहेत. पिढ्यान्‌पिढ्या चालत आलेल्या या कलेचे संवर्धन शिवराम चौधरी करत आहेत.
पिंपळसोंडच्या मातीत रुजलेली ही पारंपरिक मुखवटा कला पुण्याच्या व्यासपीठावर सादर झाल्याने सुरगाण्याच्या आदिवासी संस्कृतीला व्यापक ओळख मिळाली. मुखवट्यांची रचना, त्यातील बारकावे, पारंपरिक सौंदर्यदृष्टी आणि लोकजीवनाशी असलेले नाते यामुळे रसिकांना या कलेची वेगळीच अनुभूती मिळाली.“मुखवटा म्हणजे केवळ चेहरा नव्हे; त्यामागे आपल्या पूर्वजांची परंपरा, लोककथा आणि संस्कृतीचा इतिहास दडलेला आहे,” अशी भावना कलाकार शिवराम चौधरी यांनी व्यक्त केली.
आधुनिक काळात अनेक पारंपरिक लोककला लोप पावत असताना बोहाडा आणि सोंगी मुखवट्यांची कला जिवंत ठेवण्याचे कार्य महत्त्वाचे ठरत आहे. अशा कलाकारांना मोठ्या सांस्कृतिक मंचावर संधी मिळाल्यास या पारंपरिक कलेला नवी ओळख आणि नव्या पिढीपर्यंत पोहोचण्याचे बळ मिळू शकते.
सुरगाण्याच्या डोंगर-दऱ्यांत जपलेली पिंपळसोंडची मुखवटा कला पुण्याच्या कलामंचावर पोहोचल्याने आदिवासी कलाविश्वातील एका अनमोल परंपरेचा गौरव झाला. तालुक्यातील चिंचपाडा येथील पावरी, ठाकर नृत्य, ढोल नृत्यांने अनेकांचे लक्ष वेधून घेतले.