*कावड यात्रेला सहकार्य करणाऱ्या भाविकांचा सन्मान, पुढील वर्षी सर्वात मोठी कावड यात्रा काढण्याचा संकल्प*
नरसी(प्रतीनिधी):-नायगाव तालुक्यातील श्रीक्षेत्र राहेर ते नरसी दरम्यान नुकत्याच पार पडलेल्या भव्य कावड यात्रेच्या यशस्वी आयोजनासाठी प्रत्यक्ष-अप्रत्यक्ष स्वरूपात सहकार्य करणाऱ्या दानशूर व्यक्ती, भाविक व ग्रामस्थांचा सिद्धेश्वर महादेव मंदिर, नरसी येथे 9 सप्टेंबर रोजी सन्मान करण्यात आला. धार्मिक श्रद्धेसोबत सामाजिक बांधिलकी जपत अन्नदान, चहा, पिण्याचे पाणी, फराळ, अल्पोपहार, वाहन व्यवस्था तसेच आर्थिक स्वरूपात योगदान देणाऱ्या सेवाभावी व्यक्तींचा यावेळी गौरव करण्यात आला.
कार्यक्रमाच्या अध्यक्षस्थानी भाजपाचे नेते तथा नायगाव पंचायत समितीचे माजी सभापती श्रावण पाटील भिलवंडे होते. प्रमुख पाहुणे म्हणून वेदशास्त्र संपन्न संदीप महाराज जोशी, पोलीस पाटील इब्राहिम बेग पटेल, माजी उपसरपंच नजीरसाब बागवान, सय्यद इस्माईलसाब, ज्येष्ठ पत्रकार गंगाधर पाटील भिलवंडे व पवन गादेवार उपस्थित होते. श्री सिद्धेश्वर महादेव मंदिर, नरसी येथून 25 ऑगस्ट रोजी कावड यात्रेला प्रारंभ झाला होता. राहेर ते नरसी या मार्गावरून निघालेल्या या यात्रेत मोठ्या संख्येने भाविकांनी सहभाग घेतला. भगवान महादेवाच्या भक्तीमय जयघोषात मार्गक्रमण करणाऱ्या कावडधारी भाविकांची गैरसोय होऊ नये, यासाठी मार्गावरील विविध गावांमध्ये सामाजिक कार्यकर्ते, मान्यवर व ग्रामस्थांच्या पुढाकारातून पिण्याचे पाणी, चहा, फराळ, अल्पोपहार तसेच वाहनांसह विविध सेवा-सुविधा उपलब्ध करून देण्यात आल्या.
कावड यात्रा हा केवळ धार्मिक सोहळा न राहता सेवा, श्रद्धा आणि सामाजिक एकोपा यांचा संगम ठरला. भाविकांच्या सेवेसाठी विविध स्तरांतून मिळालेल्या सहकार्याची दखल घेत दानशूर व्यक्तींचा सन्मान करण्यात आला. अन्नदानापासून आर्थिक मदतीपर्यंत विविध स्वरूपात योगदान देणाऱ्या सेवाभावी व्यक्तींचा गौरव झाल्याने उपस्थितांमध्ये समाधानाचे वातावरण होते.
यावेळी श्री सिद्धेश्वर मंदिराचे अध्यक्ष साईनाथ अक्कमवाड, श्रीनिवास अक्कमवाड, नारायण देवशेटवार, अनिल श्रीरामवार, संतोष तमेवार, जेष्ठ पत्रकार गंगाधर गंगासागरे, कैलास तेलंग, गोविद टोकलवाड, प्रल्हाद भंडारे, गणेश कंदुरके, हनमंत चंदनकर, गुरमित अरोरा, संतोष जुकलकर यासह नागरिक मोठ्या संख्येने उपस्थित होते.
यावेळी बोलताना भाजपा नेते श्रावण पाटील भिलवंडे यांनी कावड यात्रेला भाविक, ग्रामस्थ आणि सेवाभावी दानशूर व्यक्तींकडून मिळालेल्या उत्स्फूर्त प्रतिसादाबद्दल कृतज्ञता व्यक्त केली. आगामी काळात अधिक व्यापक नियोजन करून नांदेड जिल्ह्यातील सर्वात मोठी व भव्य कावड यात्रा आयोजित करण्याचा संकल्प त्यांनी व्यक्त केला. धार्मिक परंपरेचे जतन करण्याबरोबरच समाजातील विविध घटकांना एकत्र आणणारा हा भक्तिमय उपक्रम अधिक व्यापक करण्यासाठी प्रयत्नशील राहणार असल्याचे त्यांनी सांगितले.
कावड यात्रेच्या यशस्वी आयोजनासाठी प्रत्यक्ष-अप्रत्यक्ष स्वरूपात योगदान देणाऱ्या सर्व सेवाभावी व्यक्तींचे यावेळी स्वागत व सत्कार करण्यात आला. कार्यक्रमास ग्रामस्थ, भाविक व नागरिक मोठ्या संख्येने उपस्थित होते.