*अनुस्कुरा घाटात दाट धुक्याचा विळखा; वाहनचालकांचा जीव मुठीत, घाटमाथ्यापासून अर्ध्या घाटापर्यंत दृश्यमानता अत्यंत कमी; रात्री अवजड वाहनांसह खड्ड्यांमुळे धोका*
पाचल(प्रतिनिधी):-राजापूर तालुक्यातील महत्त्वाच्या अनुस्कुरा घाटमार्गावर सध्या दाट धुक्याची समस्या निर्माण झाली असून, घाटमाथ्यापासून खाली येताना अर्ध्या घाटापर्यंत अनेक ठिकाणी अत्यंत कमी दृश्यमानतेचा सामना वाहनचालकांना करावा लागत आहे. काही ठिकाणी तर अवघ्या दोन फुटांवरील रस्ताही स्पष्टपणे दिसत नसल्याने वाहनचालकांना मोठ्या सावधगिरीने वाहने चालवावी लागत आहेत. अनुस्कुरा घाटातून दिवस- रात्र मोठ्या प्रमाणात वाहनांची वाहतूक सुरू असते. विशेषतः रात्रीच्या वेळी अवजड वाहनांची ये-जा मोठ्या प्रमाणावर होत असल्याने दाट धुक्यामुळे परिस्थिती अधिकच धोकादायक बनत आहे. धुक्यामुळे रस्त्याची दिशा, कड आणि पुढील वळण यांचा अंदाज घेणे कठीण होते. समोरून येणाऱ्या वाहनांच्या हेडलाईटमुळेही काही वेळा दृश्यमानता आणखी कमी होते. खड्डे आणि धुक्यामुळे वाढतो धोका, दाट धुक्याबरोबरच घाटातील काही ठिकाणी पडलेले खड्डे हीदेखील वाहनचालकांसाठी मोठी अडचण ठरत आहे. रात्रीच्या वेळी कमी दृश्यमानतेमुळे हे खड्डे वेळीच लक्षात येत नसल्याने वाहनाचा वेग अचानक कमी करावा लागतो किंवा खड्डा चुकवण्यासाठी वाहन वळवावे लागते. त्याचवेळी समोरून अवजड वाहन येत असल्यास परिस्थिती अधिकच धोकादायक होऊ शकते. घाटातील तीव्र वळणे, उतार, दाट धुके आणि अवजड वाहनांची वर्दळ यामुळे वाहनचालकांना प्रत्येक क्षणी सतर्क राहावे लागत आहे. त्यामुळे या मार्गावर सुरक्षिततेच्या दृष्टीने आवश्यक त्या उपाययोजना तातडीने करणे गरजेचे असल्याचे वाहनचालकांचे म्हणणे आहे.
साईड पट्ट्या आणि रिफ्लेक्टरची गरज, दाट धुक्यामध्ये रस्त्याची कड स्पष्ट दिसण्यासाठी चांगल्या दर्जाचे साईड रिफ्लेक्टर आणि रोड मार्किंग अत्यंत उपयुक्त ठरू शकते. त्यामुळे अनुस्कुरा घाटातील धुक्याची समस्या लक्षात घेऊन संबंधित विभागाने घाटाची प्रत्यक्ष पाहणी करून आवश्यक ठिकाणी साईड पट्ट्या व रिफ्लेक्टर बसवावेत, अशी मागणी होत आहे.
विशेषतः धुक्याची तीव्रता जास्त असलेल्या भागात, धोकादायक वळणांवर, उताराच्या ठिकाणी तसेच रस्त्याच्या कडेला रिफ्लेक्टर बसविल्यास वाहनचालकांना रात्रीच्या वेळी रस्त्याचा अंदाज घेण्यास मोठी मदत होऊ शकते.
अपघात होण्यापूर्वी उपाययोजना करण्याची मागणी
अनुस्कुरा घाट हा कोकणातील महत्त्वाचा वाहतूक मार्ग असून या मार्गावरून मोठ्या प्रमाणात प्रवासी वाहने, मालवाहू वाहने आणि अवजड वाहने ये-जा करतात. त्यामुळे धुक्याच्या काळात वाहनचालकांच्या सुरक्षिततेकडे विशेष लक्ष देणे आवश्यक आहे.
संबंधित विभागाने केवळ तक्रारीची वाट न पाहता घाटातील धोकादायक ठिकाणांची पाहणी करून प्राथमिक स्वरूपात रिफ्लेक्टर, साईड पट्ट्या व आवश्यक रोड मार्किंगची कामे तातडीने करावीत. तसेच रस्त्यावरील खड्ड्यांची दुरुस्ती करण्यात यावी, अशी मागणी वाहनचालकांकडून होत आहे. दाट धुक्यामुळे निर्माण होणारी कमी दृश्यमानता ही नैसर्गिक परिस्थिती असली तरी योग्य सुरक्षा उपाययोजनांच्या माध्यमातून त्याचा धोका कमी करता येऊ शकतो. त्यामुळे संभाव्य अपघात टाळण्यासाठी संबंधित विभागाने तातडीने दखल घेऊन अनुस्कुरा घाटातील आवश्यक ठिकाणी रिफ्लेक्टर व इतर सुरक्षा साधने बसवावीत, अशी अपेक्षा वाहनचालक आणि प्रवाशांकडून व्यक्त होत आहे. धुक्यात रस्ता दिसत नसताना रिफ्लेक्टरचा प्रकाशच वाहनचालकांसाठी मार्गदर्शक ठरू शकतो. त्यामुळे अपघाताची वाट न पाहता अनुस्कुरा घाटातील सुरक्षाव्यवस्थेकडे तातडीने लक्ष देण्याची गरज निर्माण झाली आहे.