*संस्था स्थापन करणे सोपे, चालविणे कठीण; सहकारी संस्थांना सहकार्य करा-आ. चंद्रकांत रघुवंशी*
नंदुरबार(प्रतिनिधी):-संस्था स्थापन करणे सोपे असते; मात्र त्या संस्था सातत्याने सक्षमपणे चालविणे कठीण असते. अनेक संस्था स्थापन झाल्यानंतर कालांतराने डबघाईला गेल्या. मात्र, माजी आमदार बटेसिंगभैया रघुवंशी यांनी नंदुरबार परिसराच्या हितासाठी स्थापन केलेल्या संस्थांचा कारभार आजही उत्तमपणे सुरू आहे. सहकार क्षेत्राच्या माध्यमातून सर्वसामान्य नागरिक, शेतकरी, शेतमजूर आणि व्यापाऱ्यांच्या हिताचे काम होत असून, नागरिकांनी सहकारी संस्थांना सहकार्य करावे, असे आवाहन शिवसेनेचे नेते तथा आमदार चंद्रकांत रघुवंशी यांनी केले.नंदुरबार येथील संजय टाऊन हॉलमध्ये कृषी उत्पन्न बाजार समिती, इंदिरा महिला सहकारी बँक, शेतकरी सहकारी संघ, इंदिरा महिला सहकारी गृहउद्योग व जीवनावश्यक वस्तू पुरवठा भांडार या संस्थांच्या वार्षिक सर्वसाधारण सभा आयोजित करण्यात आल्या होत्या. यावेळी उपस्थितांना मार्गदर्शन करताना आ. रघुवंशी बोलत होते. आ. रघुवंशी म्हणाले की, जिल्हा मध्यवर्ती सहकारी बँकेकडून अनेक सहकारी संस्थांच्या लिलावाची प्रक्रिया सुरू आहे. शहादा येथील काही सहकारी संस्थांचे लिलाव थांबविण्यासाठी आपण प्रयत्न केले आहेत. सहकार क्षेत्रात काम करताना शेतकरी, शेतमजूर, सर्वसामान्य नागरिक तसेच व्यापाऱ्यांच्या हिताच्या दृष्टीने अनेक महत्त्वपूर्ण निर्णय घेण्यात आले आहेत. यावेळी उद्योगपती मनोज रघुवंशी, नगराध्यक्ष रत्ना रघुवंशी, इंदिरा महिला सहकारी बँकेच्या अध्यक्षा कविता रघुवंशी, शिवसेना जिल्हाप्रमुख ॲड. राम रघुवंशी, शेतकी संघाचे अध्यक्ष बी. के. पाटील, नगरसेवक यशवर्धन रघुवंशी, बाजार समिती सभापती ठाणसिंग राजपूत, जिल्हा परिषद सदस्य देवमन पवार, शिवसेना तालुकाप्रमुख डॉ. सयाजी मोरे, उद्योगपती संजय अग्रवाल आदी उपस्थित होते.