*सचिन बेर्डे यांच्या पाठपुराव्याला मोठे यश,पाळटोक धनगरवाडी शाळा प्रकरणी चौकशीचे आदेश*
लांजा(प्रतिनिधी):-तालुक्यातील पाळटोक धनगरवाडी (कोंडके क्र.5) येथील जिल्हा परिषद प्राथमिक शाळेच्या गंभीर प्रश्नासाठी सातत्याने आवाज उठवणारे युवा नेतृत्व सचिन बेर्डे यांच्या प्रयत्नांना अखेर मोठे यश मिळाले आहे. पंचायत समिती लांजा यांनी या प्रकरणाची गंभीर दखल घेत संबंधित अधिकाऱ्यांची चौकशी करण्याचे आदेश देत चौकशी समिती नेमली आहे.
सचिन बेर्डे यांनी शाळेच्या इमारतीच्या स्थिती, विद्यार्थ्यांच्या शिक्षणाची झालेली गैरसोय, निधी, प्रशासकीय प्रक्रिया तसेच शाळा बंद पडण्यामागील कारणांची सखोल चौकशी करण्याची मागणी केली होती. त्यांच्या पाठपुराव्यानंतर पंचायत समितीने या संपूर्ण प्रकरणाची चौकशी करण्याचा निर्णय घेतला आहे. चौकशीमध्ये शाळा प्रकरणातील सर्व नोंदी, मंजुरी, प्रशासकीय मान्यता, तांत्रिक मान्यता, निधी, बांधकामाशी संबंधित कागदपत्रे, शाळा दप्तरात का आली नाही, निधी मंजूर झाला होता का, जुनी इमारत कोणाच्या आदेशाने खोदण्यात आली तसेच विद्यार्थ्यांसाठी नवीन शाळा इमारतीचे काम तातडीने सुरू करण्याबाबत अहवाल सादर करण्याचे निर्देश देण्यात आले आहेत. या निर्णयामुळे पाळटोक धनगरवाडीतील विद्यार्थ्यांना न्याय मिळण्याची आशा निर्माण झाली असून, अनेक वर्षांपासून प्रलंबित असलेल्या शाळेच्या प्रश्नाला अखेर गती मिळाली आहे. स्थानिक नागरिकांनी सचिन बेर्डे यांच्या सातत्यपूर्ण लढ्याचे कौतुक करत हा विद्यार्थ्यांच्या भविष्यासाठी मिळालेला महत्त्वाचा विजय असल्याची भावना व्यक्त केली.
"विद्यार्थ्यांच्या शिक्षणाशी कोणतीही तडजोड होऊ देणार नाही. सत्य बाहेर येईपर्यंत आणि विद्यार्थ्यांना नवीन शाळा मिळेपर्यंत माझा लढा सुरूच राहील," अशी ठाम भूमिका सचिन बेर्डे यांनी व्यक्त केली.