*के.आर. पब्लिक स्कूलमध्ये गुरुपौर्णिमा उत्साहात साजरी*
नंदुरबार(प्रतिनिधी):-कन्हैयालाल रावजीभाई पब्लिक स्कूल, नंदुरबार येथे गुरुपौर्णिमा उत्साहपूर्ण वातावरणात साजरी करण्यात आली. यानिमित्त विद्यार्थ्यांनी विविध सांस्कृतिक कार्यक्रमांचे सादरीकरण करून गुरुजनांप्रती आदरभाव व्यक्त केला. कार्यक्रमाची सुरुवात दीपप्रज्वलनाने करण्यात आली. विद्यार्थ्यांनी गुरूंच्या महत्त्वावर आधारित नाटिका, गीत, नृत्य तसेच मनोगते सादर केली. “गुरुजींची श्रेष्ठता” आणि “विद्यादानाचे महत्त्व” यावर विद्यार्थ्यांनी प्रभावी भाषणे करून उपस्थितांची मने जिंकली. या कार्यक्रमाला संस्थेचे अध्यक्ष किशोर वाणी, उपाध्यक्ष सिद्धार्थ वाणी तसेच प्राचार्या डॉ. छाया शर्मा यांची प्रमुख उपस्थिती लाभली. अध्यक्ष किशोर वाणी यांनी विद्यार्थ्यांना मार्गदर्शन करताना गुरुजनांचा सन्मान राखण्याचे व ज्ञानार्जनासाठी सतत प्रयत्नशील राहण्याचे आवाहन केले. त्यांनी सर्व विद्यार्थ्यांना गुरुपौर्णिमेच्या शुभेच्छाही दिल्या. प्राचार्या डॉ. छाया शर्मा यांनी आपल्या भाषणात गुरूंचे विद्यार्थ्यांच्या जीवनातील स्थान अधोरेखित केले व विद्यार्थ्यांनी गुरूंकडून मिळणाऱ्या ज्ञानाचा योग्य उपयोग करून आदर्श नागरिक बनावे, असे सांगितले. कार्यक्रमाच्या यशस्वी आयोजनासाठी शिक्षक व विद्यार्थ्यांनी विशेष परिश्रम घेतले. संपूर्ण कार्यक्रम उत्साहपूर्ण आणि प्रेरणादायी वातावरणात संपन्न झाला.