*के.आर. पब्लिक स्कूलमध्ये आषाढी एकादशी उत्साहात साजरी*
नंदुरबार(प्रतिनिधी):-श्री स्वामी समर्थ विद्यानिकेतन संचलित के.आर. पब्लिक स्कूल, नंदुरबार येथे आषाढी एकादशीचा पवित्र सण मोठ्या उत्साहात व भक्तिमय वातावरणात साजरा करण्यात आला. सकाळी 7.30 वाजता विद्यार्थी, शिक्षक व शिक्षकेतर कर्मचारी यांच्या उपस्थितीत विशेष सांस्कृतिक कार्यक्रमाचे आयोजन करण्यात आले. या कार्यक्रमास संस्थेचे चेअरमन किशोर वाणी, व्हाइस चेअरमन सिद्धार्थ वाणी तसेच प्राचार्या डॉ. छाया शर्मा यांची प्रमुख उपस्थिती लाभली.
यावेळी चेअरमन किशोर वाणी यांनी विद्यार्थ्यांना आषाढी एकादशीचे धार्मिक, सांस्कृतिक व आध्यात्मिक महत्त्व सांगितले. तसेच सर्वांना पवित्र श्रावण महिन्याच्या हार्दिक शुभेच्छा देत भारतीय संस्कृती व परंपरांचे जतन करण्याचे आवाहन केले. विद्यार्थ्यांनी विठ्ठल-रुक्मिणी भक्तीगीते, अभंग, वेशभूषा सादरीकरण आणि सांस्कृतिक कार्यक्रमातून वारकरी परंपरेचे सुंदर दर्शन घडविले. संपूर्ण परिसर भक्तिमय वातावरणाने भारावून गेला.
हा कार्यक्रम यशस्वी करण्यासाठी शाळेच्या सांस्कृतिक विभागाने विशेष परिश्रम घेतले, तसेच सर्व शिक्षक व कर्मचाऱ्यांनी सहकार्य केले.