*संतोष प्रतिष्ठानतर्फे सोगमवाडी जिल्हा परिषद मराठी शाळेला मोफत नोटबुक व संगणक भेट*
राजापूर(प्रतिनिधी):-संतोष प्रतिष्ठान (रजि.), नालासोपारा यांच्या सामाजिक बांधिलकीच्या उपक्रमांतर्गत राजापूर तालुक्यातील जिल्हा परिषद मराठी शाळा, सोगमवाडी येथे  विद्यार्थ्यांच्या शैक्षणिक प्रगतीसाठी मोफत नोटबुकचे वितरण तसेच संगणक भेट देण्याचा उपक्रम उत्साहात पार पडला. या उपक्रमांतर्गत विद्यार्थ्यांना शैक्षणिक साहित्याचे मोफत वाटप करण्यात आले. तसेच शाळेला संगणक भेट देण्यात आल्यामुळे ग्रामीण भागातील विद्यार्थ्यांना डिजिटल शिक्षणाची सुविधा उपलब्ध होणार असून आधुनिक तंत्रज्ञानाचा वापर करून गुणवत्तापूर्ण शिक्षण घेण्यास मोठी मदत होणार आहे. यावेळी संतोष प्रतिष्ठानचे अध्यक्ष कृष्णा सावंत, उपाध्यक्ष कृष्णा बावकर, सचिव सुनील शिवगण, संदीप शेमणकर, प्रकाश चव्हाण, अविनाश तांबट, शाळेचे शिक्षकवृंद, पालक आणि विद्यार्थी मोठ्या संख्येने उपस्थित होते.
उपस्थित मान्यवरांनी विद्यार्थ्यांना शिक्षणासोबतच आधुनिक तंत्रज्ञानाचा प्रभावी वापर करण्याचे आवाहन केले. शाळेला संगणक भेट व विद्यार्थ्यांना मोफत नोटबुकचे वितरण केल्याबद्दल शिक्षक, पालक आणि ग्रामस्थांनी संतोष प्रतिष्ठानचे मनःपूर्वक आभार मानले. ग्रामीण विद्यार्थ्यांच्या शैक्षणिक व डिजिटल सक्षमीकरणासाठी संतोष प्रतिष्ठान राबवत असलेले असे उपक्रम समाजासाठी प्रेरणादायी असून भविष्यातही अशा उपक्रमांची गरज असल्याचे मत उपस्थितांनी व्यक्त केले.