*बारीसुरगस येथील जिल्हा परिषद शाळेच्या गळक्या वर्गखोलीला प्लॅस्टिकच्या कापडाचा आधार*
नंदुरबार(प्रतिनिधी):-नंदुरबार जिल्ह्यातील अक्कलकुवा तालुक्यातील अतिदुर्गम भागातील बारी सुरगस येथील जिल्हा परिषदेच्या शाळेची इमारत मागील गेल्या दोन वर्षांपासून पडक्या अवस्थेत असून ती अद्यापपर्यंत दुरुस्त वा नवीन इमारत बांधकाम करण्यात आली नसल्याने, शिक्षणाविषयी ची अनास्था स्पष्ट दिसून येत आहे, इमारत नसल्याने विद्यार्थ्यांचे हाल होत आहेत.
अक्कलकुवा तालुक्यातील अतिदुर्गम भागातील बारी सुरगस येथे इयत्ता पहिली ते चौथी पर्यत असलेली जिल्हा परिषद शाळा असून, शाळेची एकूण पटसंख्या 51 असून, तर दोन शिक्षक कार्यरत आहेत. याबाबत गटसाधन केंद्र व शिक्षणाधिकारी कार्यालयात देखील शाळा दुरूस्तीचे प्रस्ताव सादर करण्यात आले असताना, शाळेच्या इमारतीचे बांधकाम लाल फितीत अडकल्याची चर्चा आहे. शालेय इमारत बांधकामा संदर्भात प्रशासकीय स्तरावर सतत पाठपुरावा केला असल्याचे शिक्षकांनी सांगितले. मात्र दोन वर्ष उलटून देखील अद्यापपर्यंत शाळेची दुरूस्ती वा नवीन इमारत झाली नसल्याने विद्यार्थ्यांचे शैक्षणिक नुकसान होऊन पावसाळ्यात हाल होत आहेत. गेल्या वर्षी देखील शिक्षकांनी स्वखर्चाने ताडपत्री आणून दोन्ही खोल्यांवर टाकून पावसाळ्यात तात्पूरती व्यवस्था केली होती.एकाच खोलीत चार ही वर्गातील विद्यार्थी कसेबसे शिक्षण घेत आहेत. विद्यार्थ्यांना आधूनिक शिक्षण देण्यासाठी नवीन शैक्षणिक धोरण जाहीर करण्यात आले मात्र एकीकडे अक्कलकुवा तालुक्यातील अतिदुर्गम भागातील आदिवासी विद्यार्थ्यांच्या नशिबी अद्यापही योग्य अश्या भौतिक सुविधा ही उपलब्ध नाहीत.
एकीकडे शासनाकडून विद्यार्थ्यांना दर्जेदार शिक्षण देण्याचा प्रयत्न केला जातो. मात्र अक्कलकुवा तालुक्यातील अतिदुर्गम भागातील आदिवासी विद्यार्थ्यांचे शैक्षणिक नुकसान होत असल्याचे दिसून येते. याकडे लोकप्रतिनिधी व शिक्षण विभाग व प्रशासनाने लक्ष वेधून इमारतीचे बांधकाम लवकरात लवकर पूर्ण करण्याची मागणी पालकांकडून केली जात आहे.