*आदिवासी युवा सेना संघटनेकडून सोना गॅस एजन्सीविरोधात तहसीलदार,शहादा यांना निवेदन*
‎‎शहादा(प्रतिनिधी):-तालुक्यातील ग्रामीण व दुर्गम भागातील नागरिकांना घरगुती गॅस सिलिंडर वेळेवर मिळत नसल्याच्या तक्रारींच्या पार्श्वभूमीवर आदिवासी युवा सेना संघटनेच्या वतीने तहसीलदार, शहादा यांना निवेदन देण्यात आले. ‎भारतीय संविधानातील अनुच्छेद 19, 21 व 38 चा उल्लेख करत संघटनेने सार्वजनिक हिताच्या दृष्टीने ही तक्रार केली आहे. निवेदनानुसार, मंडाणा परिसरातील वागर्डे, तितरी, जाम, जावदे त.ह. तसेच इतर गावांतील अनेक नागरिकांनी घरगुती गॅस सिलिंडरचे बुकिंग करूनही 15 ते 20 दिवस उलटल्यानंतरही गॅस सिलिंडर मिळत नसल्याच्या तक्रारी केल्या आहेत. त्यामुळे ग्रामीण व दुर्गम भागातील नागरिकांना मोठ्या अडचणींचा सामना करावा लागत असून काही कुटुंबांवर पुन्हा चुली पेटवण्याची वेळ आली असल्याचे निवेदनात नमूद करण्यात आले आहे. ‎निवेदनात पुढे म्हटले आहे की, शासनाच्या नियमांनुसार घरगुती वापरासाठी असलेले LPG गॅस सिलिंडर आणि हॉटेल, ढाबे, रेस्टॉरंट यांच्यासाठी वापरण्यात येणारे व्यावसायिक (Commercial) LPG गॅस सिलिंडर वेगवेगळे असतात. त्यामुळे घरगुती वापरासाठी असलेल्या गॅस सिलिंडरचा व्यावसायिक वापर करणे नियमबाह्य मानले जाते. ‎तसेच, काही हॉटेल व ढाबा चालकांना 1500 ते 2000 रुपये दराने घरगुती गॅस सिलिंडर पुरवठा होत असल्याच्या तक्रारी नागरिकांकडून प्राप्त झाल्या असून, या संपूर्ण प्रकरणाची निष्पक्ष व सखोल चौकशी करण्यात यावी, अशी मागणी संघटनेने केली आहे. ‎एकीकडे सर्वसामान्य ग्राहकांना अनेक दिवस प्रतीक्षा करूनही गॅस सिलिंडर मिळत नसताना दुसरीकडे व्यावसायिकांना प्राधान्य दिले जात असल्याची भावना नागरिकांमध्ये निर्माण झाली आहे. तसेच गॅस वितरण व्यवस्थेत पारदर्शकता ठेवून ग्रामीण व दुर्गम भागातील सर्व पात्र ग्राहकांना नियमानुसार व वेळेत घरगुती गॅस सिलिंडर उपलब्ध करून द्यावेत, अशी मागणीही निवेदनाद्वारे करण्यात आली आहे. ‎याशिवाय, गावांमधील नागरिकांना तातडीने व नियमित घरगुती गॅस सिलिंडर पुरवठा सुरू करावा, अशी मागणी संघटनेने केली आहे. ‎या संपूर्ण प्रकरणाची तात्काळ चौकशी करून दोषी आढळणाऱ्या संबंधित अधिकारी, कर्मचारी व एजन्सी व्यवस्थापनावर योग्य ती कारवाई करावी, अशी मागणी आदिवासी युवा सेना संघटनेने केली आहे. ‎येत्या 15 दिवसांत गॅस पुरवठा सुरळीत न झाल्यास व संबंधित तक्रारींची दखल न घेतल्यास आदिवासी युवा सेना संघटनेच्या वतीने लोकशाही मार्गाने रास्ता रोको आंदोलन करण्यात येईल, असा इशाराही निवेदनाद्वारे देण्यात आला आहे. ‎दरम्यान, या निवेदनाच्या प्रती उपविभागीय दंडाधिकारी, शहादा, जिल्हाधिकारी, नंदुरबार आणि सोना गॅस एजन्सीचे व्यवस्थापक यांना देखील पाठविण्यात आल्या असून संबंधित प्रकरणाची तात्काळ दखल घेण्याची मागणी करण्यात आली आहे.‎ ‎दिलीप एस. महिरे तालुका अध्यक्ष, ‎सुनिल पवार सोशल मीडिया प्रमुख,
‎दिलीप मुसळदे कार्यकर्ता,
‎राजेश ठाकरे  कार्यकर्ता,
‎रोहित पवार  कार्यकर्ता,
‎भागीरथ ठाकरे कार्यकर्ता,
‎दगडू निकुंम कार्यकर्ता ‎तसेच आदिवासी युवा सेना संघटनेचे इतर पदाधिकारी व मोठ्या संख्येने कार्यकर्ते उपस्थित होते.