*भाजपाचे माजी प्रदेश महामंत्री विजय चौधरी यांची जळगांव व अहिल्यानगर जिल्हयाच्या प्रभारीपदी नियुक्ती*
नंदुरबार(प्रतिनिधी):-भारतीय जनता पार्टीचे माजी प्रदेश महामंत्री विजय चौधरी यांची जळगांव व अहिल्यानगर जिल्हयाच्या प्रभारी पदी भाजपाचे प्रदेशाध्यक्ष आ. रविंद्र चव्हाण यांनी नियुक्ती केली आहे. नुकतेच राज्यभरातले 44 प्रभारी यांची यादी प्रदेशाध्यक्ष आ. रविंद्र चव्हाण यांनी जाहिर केली आहे यात उत्तर महाराष्ट्रातील जळगांव व अहिल्यानगर या राजकीय दृष्टया अतिशय महत्वाच्या जिल्हयाची जबाबदारी विजय चौधरी यांच्यावर सोपविण्यात आली आहे. विजय चौधरी यांनी भारतीय जनता पार्टीच्या संघटनात्मक प्रवासात ओबीसी मोर्चा प्रदेशाध्यक्ष, जिल्हाध्यक्ष भाजपा नंदुरबार व प्रदेश महामंत्री भाजपा महाराष्ट्र यासह प्रदेशाहुन सोपविलेल्या प्रदेश संयोजक बुथ सशक्तीकरण अभियान, प्रदेश संयोजक भगवान बिरसा मुंडा 150 वी जयंती, प्रदेश संयोजक विर बाल दिवस, प्रदेश संयोजक दिवार लेखन, प्रदेश संयोजक पुण्यश्लोक अहिल्यादेवी त्रिशताब्दी महोत्सव, प्रदेश संयोजक सरल ॲप, प्रदेश संयोजक नमो ॲप, प्रदेश प्रभारी भवन निर्माण, प्रदेश प्रभारी ओबीसी मोर्चा, सहप्रमुख प्रदेश अध्यक्ष दौरा अश्या अनेक महत्वपुर्ण जबाबदाऱ्या अतिशय ताकदीने पार पाडल्यात. विजय चौधरी यांना पक्षाने ही महत्वपुर्ण जबाबदारी दिल्याने कार्यकर्त्यांमध्ये आनंद संचारला आहे. विजय चौधरी यांचे कुशल संघटन, जुने-नवे कार्यकर्ते यांना एकत्रित घेऊन काम करण्याची पध्दत त्यामुळे कार्यकर्त्यांमध्ये या नियुक्तीबददल समाधान व्यक्त करण्यात आले आहे. या नियुक्तीबददल राज्याचे मुख्यमंत्री देवेंद्र फडणवीस, प्रदेशाध्यक्ष आ.रविंद्र चव्हाण, महसुल मंत्री ना. चंद्रशेखर बावनकुळे, जलसंपदा मंत्री ना. गिरीष महाजन, जलसंपदा मंत्री ना. राधाकृष्ण विखे पाटील, पणन व राजशिष्टाचार मंत्री ना. जयकुमार रावल, वस्त्रोउद्योग मंत्री ना. संजय सावकारे, केंद्रिय राज्यमंत्री ना.रक्षा खडसेसह अनेकांनी विजय चौधरी यांचे अभिनंदन केले आहे.