*साकुर्डे स्पोर्ट्स क्लब आयोजित साकुर्डे प्रीमियर लीग (SPL) चा प्रथम क्रमांकाचा मानकरी ठरला श्रीसाई समर्थ क्रिकेट संघ*
विरार(प्रतिनिधी):-दापोली तालुक्यातील साकुर्डे स्पोर्ट्स क्लब आयोजित साकुर्डे प्रीमियर लीग या मानाच्या स्पर्धेचे 5 वे पर्व 4 आणि 5 एप्रिल रोजी नायगाव येथील टिवरी मैदानात मोठ्या उत्साहाने पार पडली. साकुर्डे गावातील गणेशनगर, जोशीवाडी, अबगुलवाडी, राजेवाडी, जगदाळेवाडी, कुंभारखाण, बौद्धवाडी, लाडवाडी या वाडीतील एकूण 10 संघ या स्पर्धेत सहभागी झाले होते. अंतिम सामन्यातील चुरशीच्या लढतीत श्री साई समर्थ संघाने अक्षरा 11 संघावर विजय मिळवत SPL च्या 5 व्या पर्वाच्या चषकावर आपले नाव कोरले. तर शिवबा 11 यांनी तृतीय आणि माऊली 11 यांनी चतुर्थ क्रमांकावर समाधान मानावे लागले. सर्व विजेत्या संघाना आकर्षक चषक आणि रोख पारितोषिक देऊन गौरविण्यात आले.
सांघिक यशासोबत वैयक्तिक स्तरावर चमकदार कामगिरी करणाऱ्या खेळाडूंना देखील यावेळी सन्मानित करण्यात आले. यामध्ये मालिकाविराचा पुरस्कार श्री साई समर्थ, जोशीवाडी संघाचा खेळाडू यश बैकर याला देण्यात आला. त्याचप्रमाणे उत्कृष्ट फलंदाज उत्तम गोटेकर (शिवबा 11), उत्कृष्ट गोलंदाज विजय अबगुल (अक्षरा 11), सिक्सर किंग अभय गोटेकर (श्री साई समर्थ), चौकार किंग (शिवबा 11), उत्कृष्ट क्षेत्ररक्षक अरुण अबगुल (श्रीहीत 11), उत्कृष्ट यष्टिरक्षक रोहन अबगुल (माउली 11), उदयोन्मुख खेळाडू हर्षराज अबगुल (माउली 11) यांचा देखील आकर्षक चषक आणि भेटवस्तू देऊन गौरव करण्यात आला. या स्पर्धेला गावातील विविध क्षेत्रात कार्यरत मान्यवरांनी उपस्थित राहून शुभेच्छा दिल्या. सदर स्पर्धा यशस्वी करण्यासाठी साकुर्डे स्पोर्ट्स क्लबचे अध्यक्ष अल्पेश जगदाळे, सचिव विशाल पांढरे आणि त्यांची सर्व कार्यकारी टीम यांनी अनेक दिवस घेतलेली मेहनत आणि उत्तम नियोजन याची प्रचिती मैदानावर दिसून आली. ही स्पर्धा ज्यांच्या सहकार्याने पार पडली ते सर्व देणगीदार, हितचिंतक,स्पर्धेचे समालोचक, पंच तसेच साकुर्डे स्पोर्ट्स क्लबचे सर्व खेळाडू यांचे आभार मानून स्पर्धेची सांगता करण्यात आली.