*नमो बुद्धाय चषक स्पर्धेत आई शिंब्रादेवी ओझरे बु. संघ विजेता*
दिवा(प्रतिनिधी):-दिवा येथे नमो बुद्धाय चषक 2026 ही क्रिकेट स्पर्धा दि.29 मार्च 2026 रोजी उत्साहात पार पडली. ही स्पर्धा केवळ खेळापुरती मर्यादित न राहता आपुलकी, एकता आणि जिव्हाळ्याच्या नात्यांचा सुंदर संगम ठरली. तळपत्या उन्हात खेळाडूंनी दाखवलेली जिद्द, चौकार-षटकारांवर उसळणारा जल्लोष, वाढता थरार आणि प्रेक्षकांचा कडकडाट यामुळे वातावरण रंगतदार झाले. स्पर्धेसाठी उत्कृष्ट दर्जाची खेळपट्टी, अनुभवी पंच तसेच मार्लेश्वर पंचक्रोशीमध्ये प्रथमच अनुभवायला मिळालेले समालोचन ही या स्पर्धेची वैशिष्ट्ये ठरली. स्पर्धेचा विजेता आई शिंब्रादेवी क्रिकेट संघ, ओझरे बुद्रुक यांनी पटकावला, तर शिंब्रादेवी विठ्ठल रखुमाई क्रिकेट संघ ओझरे बु. ला उपविजेतेपदावर समाधान मानावे लागले. मार्लेश्वर आंगवली संघाने तृतीय, तर हातीव इलेव्हन संघाने चतुर्थ क्रमांक मिळविला.
वैयक्तिक पारितोषिकांमध्ये दिलीप पाष्टे यांना उत्कृष्ट फलंदाज, राजेश हातीम यांना उत्कृष्ट क्षेत्ररक्षक तसेच मालिकावीर, तर विवेक पाष्टे यांना उत्कृष्ट गोलंदाज (मॅजिशियन) पुरस्कार देण्यात आला. स्पर्धेच्या यशस्वी आयोजनासाठी सर्व सहभागी संघ, मान्यवर, क्रिकेटप्रेमी प्रेक्षक आणि मार्लेश्वर पंचक्रोशी क्रिकेट समिती कार्यकारिणी कमेटी यांचे आभार मानण्यात आले.