*एकलव्य विद्यालयात राष्ट्रीय विज्ञान दिवस साजरा*
नंदुरबार(प्रतिनिधी):-एकलव्य विद्यालयात राष्ट्रीय विज्ञान दिवस उत्साहपूर्ण वातावरणात साजरा करण्यात आला.
कार्यक्रमाची सुरवात सर सी. व्ही. रमण यांच्या प्रतिमेचे मान्यवरांच्या हस्ते पूजन व पुष्पहार अर्पण करून झाली. विज्ञान विभागाकडून  मिलिंद वडनगरे यांनी कार्यक्रमाचे प्रमुख अतिथी प्राचार्य सुनील चौधरी यांचे पुष्पगुच्छ व भेटवस्तू देऊन स्वागत केले.
विज्ञान दिनानिमित्त कु. रेवा खैरनार हिने विज्ञानाचे आजच्या युगातील महत्व काय आहे यावर आपले मत व्यक्त केले. मिलिंद वडनगरे यांनी आपल्या कल्पकतेतून तयार केलेल्या विविध उपकरणांचा आणि त्यातील वैज्ञानिक बाबींचा प्रयोगाद्वारे खुलासा करून विद्यार्थ्यांची मने जिंकली. कार्यक्रमादरम्यान, शैक्षणिक वर्ष 2025-26 मध्ये विज्ञान विषयाशी निगडीत उपक्रमांत उल्लेखनीय कामगिरी केल्याबद्दल विज्ञान शिक्षक, विद्यार्थी तसेच विज्ञान दिनानिमित्त आयोजित प्रश्नमंजुषा आणि पोस्टर प्रदर्शनातील विजेत्यांना मान्यवरांच्या हस्ते भेटवस्तू देऊन गौरविण्यात आले.
व्यासपीठावर विद्यालयाचे प्राचार्य  सुनील चौधरी, संस्थेचे विज्ञान विभाग प्रमुख  मिलिंद वडनगरे, विद्यालयाच्या विज्ञान विभाग प्रमुख सौ. मेधा गायकवाड तसेच ज्येष्ठ शिक्षक वसंत वसईकर, टिका पाडवी, धर्मेंद्र मराठे, सुनील पाटील, दिपक माळी तसेच एकलव्य विद्यालय तथा ज. ग. नटावदकर कनिष्ठ महाविद्यालयाचे सर्व विज्ञान शिक्षक उपस्थित होते.
कार्यक्रमाचे सूत्रसंचालन सौ. किरण रघुवंशी यांनी केले तर आभार प्रदर्शन संदीप पाटील यांनी केले.