*रायपाटणच्या खिंडीत म्हशी आडव्या आल्याने झालेल्या अपघातात दुचाकीस्वार गंभीर जखमी*
राजापूर(प्रतिनिधी):-तालुक्यातील ओणी-अणुस्कुरा मार्गावर रायपाटण मधील खिंडीत गुरुवार 10 ऑक्टोबर रोजी रात्री साडे न‌ऊच्या सुमारास म्हशी आडव्या आल्याने झालेल्या अपघातात दुचाकीस्वारांना गंभीर दुखापत झाली आहे. या अपघातात रायपाटणचे रहिवासी रामदास गांगण व सुहास गांगण यांची हाताची हाडे फ्रँक्चर झाल्याने त्यांना उपचारासाठी सिंधुदुर्ग येथील पडये हाॅस्पिटलमध्ये दाखल करण्यात आले आहे. या अपघातानंतर मोकाट गुरांचा प्रश्न पुन्हा ऐरणीवर आला आहे. गुरुवारी रात्री साडेन‌ऊच्या रामदास गांगण व सुहास गांगण हे दुचाकीवरून ओणी- अणुस्कुरा मार्गावरुन जात असताना रायपाटण खिंडीत अचानक म्हशी आडव्या आल्या काही कळायच्या आत त्यांचे आपल्या दुचाकीवरील नियंत्रण सुटले आणि त्यांचा अपघात झाला. या अपघातात दोघेही गंभीर जखमी जखमी झाले असून हाताच्या हाडांना दुखापत झाली या अपघाताची माहिती मिळताच स्थानिक युवक समीर खानविलकर, मया गांगण, सुशांत गांगण, विशाल गांगण आणि तुषार गांगण या युवकांनी अजिबात वेळ न दवडता तत्काळ सिंधुदुर्ग येथील पडये हाॅस्पिटलमध्ये दाखल केले त्यामुळे दोघांवर त्वरीत उपचार होऊ शकले
वास्तविक पाहता या मार्गावर तसेच तालुक्यातील महामार्गावर विविध ठिकाणी मोकाट गुरांचा प्रश्न गंभीर बनला आहे. लहान मोठे अपघात होत असल्याने जिवितहानी व वित्तहानी होत आहे. मोकाट गुरांना आवर घालण्याबाबत वारंवार जनजागृती होऊन अपघाताच्या घटना समोर येऊनही प्रशासन यांवर कोणतीही ठाम भूमिका का घेत नाही असा संतप्त प्रश्न आता नागरीक विचारत आहेत. रायपाटण खिंडीत या घडलेल्या ताज्या घटनेत निरपराध व्यक्तींना मोठी दुखापत झाली आहे. केवळ दैव बलवत्तर म्हणून जीव वाचला. मात्र रस्त्यावर मोकाट फिरणाऱ्या गुरांचा बंदोबस्त न केल्यास भविष्यात मोठी दुर्घटना घडण्याची भीती व्यक्त होत आहे. प्रशासनाने याची गंभीर दखल घेऊन  मोकाट गुरांच्या मालकांवर कठोर कारवाई करावी आणि या समस्येवर कायमस्वरूपी तोडगा काढावा अशी मागणी आता परिसरातील नागरिक व अपघातग्रस्तांचे कुटुंबिय करत आहेत.