*श्री काशिनाथ बाबा मंदिरावर कार्तिक अमावस्येला झाले ध्वजारोहण* 
नंदुरबार(प्रतिनिधी):-गवळी समाजासह असंख्य भाविकांचे श्रद्धास्थान आणि नवसाला पावणारे श्री काशिनाथ बाबा मंदिरावर शनिवार 30 नोव्हेंबर रोजी कार्तिक अमावस्यानिमित्त ध्वजारोहण, होम हवन, पूजाअर्चा झाली. असंख्य भाविकांनी  महाप्रसादाचा लाभ घेतला. यंदा कार्तिक अमावस्या निमित्त शनिवार 30 नोव्हेंबर रोजी सकाळी दहा वाजेला बालवीर चौकातून वाजत गाजत ध्वज मिरवणूक काढण्यात आली. या मिरवणुकीत कलशधारी महिला सुहासिनींचा सहभाग होता. ध्वज मिरवणूक बालवीर चौकातून महात्मा बसवेश्वर नगर, दादा गणपती रोड, देसाईपुरा, मोठा मारुती मंदिर, धुळे नाका, वाघेश्वरी चौफुली, गोपाल नगरमार्गे ज्ञानदीप सोसायटीच्या टेकडीवरील श्री काशिनाथ बाबा मंदिरापर्यंत पोहोचली. त्यानंतर मंदिरावर  मानकरी काशिनाथ हिरणवाळे यांच्या हस्ते ध्वज चढवण्यात आला. होम हवन, पूजाअर्चा झाल्यानंतर महाप्रसाद भंडाऱ्याचा भाविकांनी दर्शनासह लाभ घेतला. धुळे रस्त्यावरील ज्ञानदीप सोसायटीच्या टेकडीवर श्री काशिनाथ बाबा यांचे मंदिर आहे. याच ठिकाणी श्री काशिनाथ बाबा यांची समाधी असून सोबत गणपती, बजरंगबली, महादेवाची पिंड, नंदी मूर्ती आहेत. सन 1970 मध्ये धुळे रस्त्यावरील टेकडीवर गुरे चारण्यास गेले असताना दृष्टांत झाला. जंगल सदृश्य टेकडी परिसरात श्री काशिनाथ बाबा मंदिराची प्रतिष्ठापना करण्याबाबत  तत्कालीन कुस्ती क्षेत्रातील वस्ताद कै. भिकाआप्पा गवळी  पहिलवान,कै. तुकाराम पहिलवान, तसेच कुस्तीगीर स्व. विठ्ठलआप्पा हिरणवाळे, निवृत्त शिक्षक जी.एस. गवळी बंधूंनी  स्वकष्टाने मंदिराची उभारणी केली. तब्बल 52 वर्षानंतर म्हणजे दोन वर्षांपूर्वी नंदुरबार नगर पालिकेतर्फे श्री काशिनाथ बाबा मंदिरावर भव्य हायमस्ट लाईट  बसविण्यात आला. यामुळे रात्रीच्या वेळी मंदिर परिसर लख्ख प्रकाशाने खुलून दिसतो. नवसाला पावणाऱ्या श्री काशिनाथ बाबा  मंदिराचे भक्तगण मोठ्या प्रमाणावर आहेत. शनिवारी झालेल्या कार्तिक अमावस्या उत्सवा निमित्त नंदुरबारसह धुळे, जळगाव, चोपडा, चाळीसगाव, मालेगाव, नगर, पुणे व राज्यातील भाविकांनी हजेरी लावली. श्री काशिनाथ बाबा मंदिर सेवा समिती तर्फे प्रतिवर्षी कार्तिक अमावस्येला मंदिराच्या वर्धापन दिन उत्सवानिमित्त खुल्या मैदानी कुस्ती स्पर्धा भरविण्यात येतात. महाराष्ट्रासह मध्य प्रदेश, गुजरात, राजस्थान येथील नामवंत मल्लांनी यापूर्वी हजेरी लावली आहे. विनामूल्य कुस्ती स्पर्धा भरवण्याची परंपरा कायम आहे. अशी माहिती श्री काशिनाथ बाबा सेवा समितीचे समन्वयक महादू हिरणवाळे यांनी दिली.