*नंदुरबार शहरातील विविध विकास कामांसाठी 5 कोटी रुपयांचा निधी मंजूर-आ.डॉ.विजयकुमार गावित यांच्या प्रयत्नांमुळे नंदुरबार वासियांना मिळाली दिवाळी भेट*
नंदुरबार(प्रतिनिधी):- महाराष्ट्राचे माजी आदिवासी विकास मंत्री तथा भाजपचे विद्यमान आमदार डॉक्टर विजयकुमार गावित यांनी प्रस्तावित केलेल्या नंदुरबार शहराच्या विविध वसाहतींमधील 23 विकास कामांसाठी सुमारे 5 कोटी रुपयांचा निधी मंजूर झाला आहे. शहराच्या वेगवेगळ्या प्रभागातील कामांना चालना मिळणार असल्यामुळे भारतीय जनता पार्टीच्या नगरसेवकांनी आनंद व्यक्त केला असून आमदार डॉक्टर विजयकुमार गावित, माजी खासदार डॉक्टर हिना गावित, भाजपा अनुसूचित जमाती मोर्चाच्या प्रदेश उपाध्यक्ष डॉक्टर सुप्रिया गावित यांचे आभार मानले आहेत.
“नगरपरिषदांना वैशिष्ट्यपूर्ण कामासाठी विशेष अनुदान" या योजनेअंतर्गत नंदुरबार नगरपरिषद, जि. नंदुरबार करीता हा निधी मंजूर झाला आहे. अगदी दिवाळीच्या तोंडावर 5 नोव्हेंबर 2026 रोजी हा निधी मंजूर करण्यात आल्याचा शासन आदेश (जी आर) पारित झाल्यामुळे एक प्रकारे डॉक्टर विजयकुमार गावित यांच्या प्रयत्नामुळे नंदुरबार वासीयांना विकास कामांची दिवाळी भेट प्राप्त झाली असल्याची प्रतिक्रिया भाजपा नगरसेवकांनी व्यक्त केली. दरम्यान, महाराष्ट्र शासनाच्या नगर विकास विभागाने जारी केलेल्या शासन निर्णयात म्हटले आहे की, “नगरपरिषदांना वैशिष्ट्यपूर्ण कामासाठी विशेष अनुदान" या योजनेअंतर्गत नंदुरबार नगरपरिषद, जि. नंदुरबार करीता  पाच कोटी रुपये इतका निधी शासन निर्णयान्वये मंजूर करण्यात आला आहे. सदर प्रकल्प खर्चाचा 100% हिस्सा राज्य शासनाचा राहणार असून कामाची कार्यान्वयीन यंत्रणा सर्वजनिक बांधकाम विभाग राहील, असेही आदेशात म्हटले आहे. माजी मंत्री डॉक्टर विजयकुमार गावित यांनी मिळवून दिलेल्या या निधीमुळे नंदुरबार शहरातील विविध वसाहतींमधील सोयीसुविधा आणि विकास कामे पूर्णत्वास येणार आहेत. नंदुरबार नगरपालिका क्षेत्रातील व्यायाम शाळा बांधकाम करणे,  नगरपरिषदेचे सभामंडपाचे बाधकाम करणे, शाळेचे गार्डन विकसीत करणे, सामाजिक सभागृह विकसीत करणे, नगरपरिषदेचे सामाजिक सभागृह (डोम) बांधकाम करणे, मंदिराचे सभामंडप बांधणे, यासारख्या 23 कामांचा यात समावेश आहे.