*नवापूर येथे आज रोजी पंडित दीनदयाळ उपाध्याय रोजगार महाकुंभ आयोजन*
नंदुरबार(प्रतिनिधी):-कौशल्य, रोजगार, उद्योजकता व नाविन्यता विभागाच्या निर्देशानुसार नवापूर तालुक्यातील सुशिक्षित बेरोजगार युवक- युवतींसाठी पंडित दीनदयाळ उपाध्याय रोजगार महाकुंभ मेळाव्याचे आयोजन 29 सप्टेंबर 2026 रोजी सकाळी 9 वाजता शबरी माता शासकीय औद्योगिक प्रशिक्षण संस्था, धनराट रोड, लहान चिंचपाडा, नवापूर, जि. नंदुरबार येथे आयोजित करण्यात आला आहे. मेळाव्यात विविध नामवंत कंपन्यांचे प्रतिनिधी व अधिकारी सहभागी होणार असून, त्यांच्या आवश्यकतेनुसार पात्र उमेदवारांच्या थेट मुलाखती घेण्यात येणार आहेत. तसेच निवड झालेल्या उमेदवारांना जागेवरच नियुक्तिपत्र देण्यात येणार आहे. या रोजगार मेळाव्यात दहावी, बारावी उत्तीर्ण, आयटीआय, पॉलिटेक्निक, तसेच कला, विज्ञान व वाणिज्य शाखेतील पदवी व पदविकाधारक उमेदवारांना सहभागी होता येणार आहे. नवापूर तालुक्यातील पात्र व इच्छुक सुशिक्षित बेरोजगार युवक- युवतींनी या रोजगार मेळाव्यात मोठ्या संख्येने सहभागी होऊन उपलब्ध रोजगाराच्या संधींचा लाभ घ्यावा, असे आवाहन प्राचार्य, शबरी माता शासकीय शासकीय औद्योगिक प्रशिक्षण संस्था, नवापूर व आयोजन समितीच्यावतीने एका प्रसिद्धी पत्रकान्वये करण्यात आले आहे.