*सेवा संकल्प अभियानांतर्गत आदिवासी विकास विभागाच्या,विविध योजनांच्या माहिती पत्रकांचे उद्घाटन*
नंदुरबार(प्रतिनिधी):-आदिवासी विकास विभागाच्या विविध कल्याणकारी योजनांची माहिती दुर्गम भागातील शेवटच्या घटकापर्यंत पोहोचावी, या उद्देशाने सेवा संकल्प अभियानांतर्गत एकात्मिक आदिवासी विकास प्रकल्प, नंदुरबार कार्यालयात विविध योजनांच्या माहिती पत्रकांचे उद्घाटन करण्यात आले. एकात्मिक आदिवासी विकास प्रकल्पाचे प्रकल्प अधिकारी डॉ. चंद्रकांत पवार यांच्या अध्यक्षतेखाली झालेल्या या कार्यक्रमास प्रकल्प कार्यालयातील सहाय्यक प्रकल्प अधिकारी, नियोजन अधिकारी तसेच विविध शाखांचे अधिकारी व कर्मचारी उपस्थित होते. प्रकल्प अधिकारी डॉ. पवार म्हणाले, आदिवासी विकास विभागामार्फत शिक्षण, रोजगार, स्वयंरोजगार आणि आरोग्य क्षेत्रासाठी विविध महत्त्वपूर्ण योजना राबविण्यात येतात. माहितीच्या अभावामुळे दुर्गम भागातील अनेक पात्र नागरिक या योजनांच्या लाभापासून वंचित राहतात. सेवा संकल्प अभियानांतर्गत तयार करण्यात आलेली ही माहिती पत्रके नागरिकांना योजनांची माहिती सहज व सोप्या पद्धतीने समजून घेण्यासाठी उपयुक्त ठरतील. प्रकल्प कार्यालयातील सर्व अधिकारी व कर्मचाऱ्यांनी या योजनांची माहिती अधिकाधिक नागरिकांपर्यंत पोहोचविण्यासाठी गतिमानतेने काम करावे, असे आवाहन त्यांनी केले. या कार्यक्रमास प्रकल्प कार्यालयातील अधिकारी -कर्मचारी तसेच नागरिक आणि आदिवासी बांधव मोठ्या संख्येने उपस्थित होते. उपस्थित नागरिकांनी या उपक्रमाचे स्वागत केले. माहिती पत्रकांमुळे विविध शासकीय योजनांची माहिती सहज उपलब्ध होऊन पात्र लाभार्थ्यांना योजनांचा लाभ घेणे अधिक सुलभ होईल, असा विश्वास नागरिकांनी व्यक्त केला. कार्यक्रमाचे नियोजन प्रकल्प कार्यालयातील अधिकारी व कर्मचाऱ्यांनी केले. उपस्थितांचे आभार मानून कार्यक्रमाची सांगता करण्यात आली. असे एकात्मिक आदिवासी विकास प्रकल्पाचे प्रकल्प अधिकारी डॉ.पवार यांनी एका प्रसिद्धी पत्रकान्वये दिलीबी बी आहे.