*कशेळी येथे युवा ग्रुप वाडीवठारतर्फे भव्य रक्तदान शिबिर*
राजापूर(प्रतिनिधी):-तालुक्यातील कशेळी येथील युवा ग्रुप वाडीवठार (कशेळी) यांच्या वतीने 16 सप्टेंबर रोजी भव्य रक्तदान शिबिराचे आयोजन करण्यात आले आहे. “चला, रक्तदानाची मोहीम राबवूया आणि रक्तदान करून जीव वाचवूया” या सामाजिक संदेशातून या उपक्रमाचे आयोजन करण्यात आले आहे. हे रक्तदान शिबिर जाकादेवी मंदिर, कशेळी येथे सकाळी 9.30 ते दुपारी 1.30 वाजेपर्यंत आयोजित करण्यात आले आहे. रक्ताची गरज असलेल्या रुग्णांना वेळेवर रक्त उपलब्ध व्हावे तसेच रक्तदानाच्या माध्यमातून अनेकांचे प्राण वाचावेत, या उद्देशाने युवा ग्रुप वाडीवठारतर्फे या शिबिराचे आयोजन करण्यात आले आहे. या मंडळाचे हे पाचवे रक्तदान शिबिर असून, दरवर्षीप्रमाणे यंदाही नागरिकांनी मोठ्या संख्येने सहभागी व्हावे, असे आवाहन आयोजकांनी केले आहे.“धर्म, पंथ, जात विसरून रक्तदान करूया, मानवतेसाठी योगदान देऊया,” या मानवतावादी संदेशातून सर्वांनी या सामाजिक उपक्रमाला सहकार्य करण्याचे आवाहन करण्यात आले आहे. रक्तदान हे अत्यंत महत्त्वाचे सामाजिक कार्य असून, एका रक्तदात्यामुळे गरजू रुग्णाला जीवनदान मिळू शकते. त्यामुळे कशेळी परिसरातील नागरिकांसह इच्छुक रक्तदात्यांनी या शिबिरात सहभागी होऊन रक्तदान करावे, असे आवाहन युवा ग्रुप वाडीवठारच्या आयोजकांनी केले आहे.