*विरार ते चर्चगेट आषाढी एकादशी दिंडी सोहळा भक्तिमय वातावरणात उत्साहात संपन्न*
विरार(प्रतिनिधी):-प्रतिवर्षीप्रमाणे यंदाही एकादशी प्रासादिक भजन (पश्चिम रेल्वे प्रवासी) मंडळाच्या वतीने आयोजित करण्यात आलेला आषाढी एकादशी दिंडी सोहळा शनिवार, 25 जुलै 2026 रोजी अत्यंत भक्तिमय आणि उत्साहपूर्ण वातावरणात संपन्न झाला.हरिनामाच्या अखंड गजरात, टाळ-मृदुंगाच्या निनादात आणि विठ्ठल-रखुमाईच्या जयघोषात भाविकांनी दिंडीमध्ये उत्स्फूर्त सहभाग नोंदविला.
या दिंडी मिरवणुकीला सकाळी 7.55 वाजताच्या पश्चिम रेल्वे लोकलने विरार स्थानकातून प्रारंभ झाला. विरार ते चर्चगेट या संपूर्ण रेल्वे प्रवासादरम्यान वारकरी परंपरेचे दर्शन घडवत भाविकांनी भजन, अभंग आणि नामस्मरण करत वातावरण भक्तिमय केले. रेल्वे प्रवाशांनीही या अनोख्या दिंडीचे उत्स्फूर्त स्वागत करत सहभागी भाविकांना शुभेच्छा दिल्या.
दिंडी चर्चगेट येथे पोहोचल्यानंतर परतीचा प्रवास करून विरार येथील श्री विठ्ठल -रुखुमाई मंदिरात दाखल झाली. मंदिरात विठ्ठल -रखुमाईचे दर्शन, आरती आणि भजनाचा कार्यक्रम पार पडला. त्यानंतर विरार (पूर्व) येथील मनवेल पाडा, कारगील नगर येथे विलास चांदीवडे यांच्या निवासस्थानी दिंडीची सांगता करण्यात आली. यंदाच्या दिंडी सोहळ्याचे विशेष आकर्षण म्हणजे छत्रपती शिवाजी महाराजांच्या वेशभूषेतील सहभागी, ज्यांनी उपस्थितांचे लक्ष वेधून घेतले. महाराजांच्या तेजस्वी रूपामुळे दिंडीला ऐतिहासिक आणि प्रेरणादायी स्वरूप लाभले. अनेक भाविकांनी या आकर्षक वेशभूषेसोबत छायाचित्रे काढत आनंद व्यक्त केला.
या संपूर्ण सोहळ्यात सहभागी झालेल्या सर्व वारकरी, भाविक, मंडळाचे पदाधिकारी, सदस्य, पश्चिम रेल्वे प्रवासी तसेच त्यांच्या कुटुंबीयांचे एकादशी प्रासादिक भजन (पश्चिम रेल्वे प्रवासी) मंडळाच्या वतीने मनःपूर्वक आभार व्यक्त करण्यात आले.
भक्ती, एकात्मता, वारकरी परंपरा आणि सामाजिक सलोखा यांचा सुंदर संगम घडवून आणणारा हा आषाढी एकादशी दिंडी सोहळा सर्वांसाठी अविस्मरणीय ठरला. वारकरी संप्रदायाची समृद्ध परंपरा जपत विठ्ठल भक्तीचा संदेश देणाऱ्या या उपक्रमाचे सर्व स्तरांतून कौतुक होत आहे.