*मतदार याद्यांचे विशेष सखोल पुनरीक्षण सुरू, फॉर्म न भरल्यास नाव वगळले जाण्याची शक्यता*
नंदुरबार(प्रतिनिधी):-नंदुरबार शहरातील सर्व मतदारांसाठी एक अत्यंत महत्त्वाची बातमी आहे. प्रशासनामार्फत शहरात 30 जून 2026 ते 29 जुलै 2026 या कालावधीत मतदार याद्यांचे विशेष सखोल पुनरीक्षणाचा कार्यक्रम राबविण्यात येत आहे. या मोहिमेत सहकार्य न करणाऱ्या किंवा फॉर्म भरून न देणाऱ्या मतदारांचे नाव मतदार यादीतून वगळण्यात येणार असल्याची माहिती तहसिलदार प्रदीप पवार यांनी एका शासकीय प्रसिद्धी पत्रकान्वये कळविली आहे. या मोहिमेअंतर्गत मतदान केंद्रस्तरीय अधिकारी (BLO) मतदारांच्या घरोघरी जाऊन निवडणूक आयोगाने दिलेले गणना प्रपत्र (फॉर्म) भरणार आहेत. मतदारांनी या फॉर्मवर आपली अचूक माहिती भरून सोबत पासपोर्ट साईज फोटो लावणे बंधनकारक आहे. फॉर्मवर मतदाराची स्वाक्षरी झाल्यानंतर त्या फॉर्मची एक प्रत मतदाराला दिली जाईल. ज्या मतदारांना हा फॉर्म कसा भरायचा याबाबत अडचण असेल, त्यांच्यासाठी प्रत्येक गावामध्ये 'बीएलओ' (BLO) चे विशेष कॅम्प आयोजित करण्यात आले आहेत. मतदारांनी सोबत ‘दोन पासपोर्ट साईज फोटो, आधार कार्ड आणि मतदान कार्ड’ घेऊन या कॅम्पमध्ये जावे. तेथे उपस्थित अधिकाऱ्यांच्या मदतीने आपला फॉर्म भरून घ्यावा, असे आवाहन करण्यात आले आहे. "आपल्या कुटुंबातील ज्या सदस्यांची नावे मतदार यादीत आहेत, त्यांनी आपले पासपोर्ट साईज फोटो व आवश्यक माहिती देऊन घरी येणाऱ्या मतदान केंद्रस्तरीय अधिकाऱ्यांना पूर्ण सहकार्य करावे. सर्व मतदारांनी आपले फॉर्म लवकरात लवकर भरून द्यावेत." असेही तहसिलदार तथा सहा. मतदार नोंदणी अधिकारी, 3-नंदुरबार विधानसभा मतदार संघ, प्रदीप पवार यांनी या प्रसिद्धी पत्रकान्वये कळविले आहे.