*कु. रक्षित राकेश मोरे यांच्या सुमधूर आवाजातील “हो भिम बाबा सारखा” गाण्याचे होतेय सर्वत्र कौतुक*
राजापूर(प्रतिनिधी):-तालुक्यातील मिळंद गावचे सुपुत्र, ख्यातनाम गायक, गीतकार व संगीतकार राकेश मोरे यांचा अवघ्या सहा वर्षांचा मुलगा कु. रक्षित राकेश मोरे याने गायलेले “हो भिम बाबा सारखा” हे गीत सध्या महाराष्ट्रभर चर्चेचा विषय ठरत आहे. या गीताचे गीतकार अनिल वेंगसरकर यांनी डॉ. बाबासाहेब आंबेडकर यांनी शिक्षणासाठी घेतलेल्या अथक परिश्रमांचे प्रभावी चित्रण आपल्या लेखणीतून मांडले आहे. या गीताला उत्कृष्ट संगीतबद्धता स्वतः राकेश मोरे यांनी दिली आहे.
बालगायक रक्षित मोरे याने आपल्या सुमधूर आणि निरागस आवाजात हे गीत सादर केले असून,महाराष्ट्रातील नामवंत गायक व गीतकार दिलराज पवार, चंद्रकांत शिंदे (शिंदेशाही) यांच्यासह अनेकांनी त्याचे कौतुक केले आहे. या गीताचे सादरीकरण एआय व्हिडिओच्या माध्यमातून रक्षित मोरे आणि त्याची आई शितल मोरे यांच्यावर चित्रित करण्यात आले असून, ते प्रेक्षकांच्या विशेष पसंतीस उतरत आहे. वडील राकेश मोरे हे महाराष्ट्रभर स्टेज शोच्या माध्यमातून आपली कला सादर करत असतात. घरातील सरावाच्या वातावरणातच रक्षित मोरे याला संगीताची आवड निर्माण झाली. हार्मोनियम वाजवणे, माईक हातात घेऊन गाणी म्हणणे, या सर्व गोष्टी त्याने लहानपणापासून आत्मसात केल्या आहेत. आज “हो भिम बाबा सारखा” या गाण्याच्या माध्यमातून रक्षित मोरे रसिकांची मने जिंकत असून, हे गीत अल्पावधीतच लोकप्रिय होत आहे. भविष्यात अशाच प्रबोधनात्मक आणि प्रेरणादायी गीतांची निर्मिती व्हावी अशी अपेक्षा समाजातून व्यक्त होत आहे.