*मेंदीपाडा जि.प. शाळेत ‘ज्ञानज्योती सावित्रीबाई फुले लेक शिकवा’ अभियानास उत्साहात प्रारंभ*
नंदुरबार(प्रतिनिधी):-नवापूर तालुक्यातील खांडबारा केंद्र अंतर्गत असलेल्या जिल्हा परिषद प्राथमिक शाळा मेंदीपाडा येथे क्रांतीज्योती सावित्रीबाई फुले ज्ञानज्योती "लेक वाचवा लेक शिकवा अभियान" बालिका दिन कार्यक्रमाचा शुभारंभ मोठ्या उत्साहात करण्यात आला. या अभियानाच्या प्रारंभी क्रांतीज्योती सावित्रीबाई फुले यांच्या प्रतिमेचे पूजन शाळा व्यवस्थापन समितीच्या अध्यक्षा यशवंती कोकणी यांच्या शुभहस्ते करण्यात आले.
याप्रसंगी शाळा व्यवस्थापन समितीचे सदस्य, विद्यार्थ्यांचे पालक तसेच शिक्षणप्रेमी नागरिक मोठ्या संख्येने उपस्थित होते. त्यामध्ये लता गावित, प्रकाश गावित, अलका गावित, सुरेखा कोकणी, सुशीला कोकणी, रंजीत वळवी, अंगणवाडी सेविका रंजना बागुल, प्रियंका कोकणी, मुख्याध्यापिका नलिनी पवार, शिक्षिका प्रतिभा गायकवाड, कुंदा पाडवी तसेच शिक्षक गोपाल गावित आदींचा समावेश होता.
कार्यक्रमात मार्गदर्शन करताना श्रीमती प्रतिभा गायकवाड यांनी  “विद्या हे धन आहे, श्रेष्ठ साऱ्या धनाहून;
तिचा साठा जयापाशी, आहे तो खरा धनवान” या ओळींमधून शिक्षणाचे महत्त्व विशद केले. त्यांनी सांगितले की, अज्ञान, अनिष्ट रूढी व परंपरांच्या विळख्यात अडकलेल्या समाजात स्त्रीला दुय्यम स्थान दिले जात असताना, ज्ञानज्योती सावित्रीबाई फुले यांनी समाजाची वक्रदृष्टी स्वीकारून मुलींसाठी शिक्षणाचा मार्ग खुला केला. पुण्यात मुलींसाठी पहिली शाळा काढून त्यांनी सामाजिक परिवर्तनाच्या चळवळीचा भक्कम पाया घातला. त्यांच्या या महान कार्याला जगाच्या इतिहासात तोड नाही. राज्यातील विद्यार्थ्यांना सावित्रीबाई फुले यांच्या शैक्षणिक कार्याची ओळख व्हावी व त्यातून प्रेरणा मिळावी, या उद्देशाने राज्यातील सर्व शाळांमध्ये ‘ज्ञानज्योती सावित्रीबाई फुले लेक वाचवा लेक शिकवा’ अभियान राबविण्याचा निर्णय घेण्यात आला आहे. हे अभियान 3 जानेवारी ते 26 जानेवारी या कालावधीत आयुक्त (शिक्षण), महाराष्ट्र राज्य, पुणे व जिल्हा परिषद नंदुरबारचे प्राथमिक शिक्षणाधिकारी यांच्या मार्गदर्शनाखाली राबविण्यात येत आहे. यावेळी शिक्षक गोपाल गावित यांनी मार्गदर्शन करताना सांगितले की, बालकांचा मोफत व सक्तीचा शिक्षणाचा अधिकार अधिनियम, 2009 नुसार प्रत्येक बालकास समान गुणवत्तेचे मोफत व सक्तीचे प्राथमिक शिक्षण मिळणे हा त्याचा कायदेशीर हक्क आहे. मुलींच्या शिक्षणाला चालना देणे, एकही मुलगी शिक्षणापासून वंचित राहू नये, शाळाबाह्य मुलींना मुख्य प्रवाहात आणणे, स्थलांतरित पालकांच्या मुलींच्या शिक्षणाची हमी देणे, मुलींमध्ये आत्मविश्वास, तार्किक विचार, शारीरिक क्षमता व सृजनशीलता वाढविणे तसेच विशेष शिक्षणातील विद्यार्थिनींची गळती कमी करणे, या उद्देशाने या अभियानांतर्गत विविध उपक्रम राबविण्यात येणार आहेत. ज्ञानज्योती सावित्रीबाई फुले यांनी ज्या महान उद्देशाने शिक्षणाची चळवळ सुरू केली, तोच उद्देश केंद्रस्थानी ठेवून बालिका दिन ‘लेक शिकवा, लेक वाचवा’ अभियानांतर्गत विविध शैक्षणिक व जनजागृतीपर कार्यक्रमांचे आयोजन करण्यात आले आहे.