*अक्षरांच्या उजेडात धसाडी–वाचन संस्कृतीचा जागर* 

धसाडी(प्रतिनिधी):-येथील जिल्हा परिषद प्राथमिक शाळा अक्षरांच्या सुगंधाने भारावून गेली. अक्षर आनंद वाचन चळवळीचे मुख्य प्रवर्तक माननीय विनोद शेंडगे यांनी शाळेला दिलेल्या प्रेरणादायी भेटीमुळे वाचन संस्कृतीचा नवा दीप उजळून निघाला!
विद्यार्थ्यांमध्ये वाचनाची गोडी निर्माण होण्यासाठी केवळ शाळा नव्हे, तर घर आणि कुटुंबही वाचनमय असावे, हा मौलिक विचार शेंडगे यांनी आपल्या ओघवत्या, भावस्पर्शी शैलीत मांडला. “विद्यार्थी हे सतत अनुकरण करत असतात,” असे सांगत त्यांनी सहकुटुंब वाचन ही संकल्पना प्रभावीपणे विद्यार्थ्यांसमोर मांडली. रोज किमान 20 पानांचे वाचन, वाढदिवस साजरा करताना पुस्तक भेट देणे, तसेच वाचनाला दैनंदिन सवय बनविणे - अशा अनेक उपक्रमांची त्यांनी प्रेरक उदाहरणांसह ओळख करून दिली. काळाच्या ओघात हरवू लागलेली वाचन संस्कृती पुन्हा लोकांपर्यंत पोहोचवण्याची गरज त्यांनी ठामपणे अधोरेखित केली.
यावेळी त्यांनी धसाडी शाळेच्या वाचनालयास भेट देत विद्यार्थ्यांची वाचनाची आवड, शाळेचा स्वच्छ व सुंदर परिसर तसेच गावकऱ्यांचा शैक्षणिक सहभाग यांचे मनःपूर्वक कौतुक केले. या प्रेरणादायी कार्यक्रमाला शालेय व्यवस्थापन समितीचे उपाध्यक्ष रामप्रसाद शिंदे, गावातील वाचनालयाचे संचालक शिवराज शिंदे, मुख्याध्यापिका श्रीमती मालती एमेकर, तसेच श्रीमती गिरी, लक्ष्मण चौधरी, प्रकाश पंडित, श्रीमती रेणुका  सूर्यवंशी व मोठ्या संख्येने पालक उपस्थित होते.
अक्षरांच्या प्रकाशाने उजळलेली ही भेट धसाडीच्या शैक्षणिक इतिहासात वाचन पर्व म्हणून कायमची कोरली गेली.