*जीटीपी महाविद्यालयाची विद्यार्थीनी रिंकी पावराला  खेलो इंडिया स्पर्धेत रजत पदक*
नंदुरबार(प्रतिनिधी):-नुकत्याच सवाई मानसिंग स्टेडियम, जयपुर, राजस्थान येथे खेलो इंडिया विद्यापीठ स्पर्धेतील ट्रॅक अँड फिल्ड प्रकारांच्या स्पर्धा संपन्न झाल्या. या स्पर्धेत जी. टी. पाटील महाविद्यालयाची विद्यार्थिनी कु. रिंकी धन्या पावरा पाच हजार मीटर धावणे या क्रीडा प्रकारासाठी क.ब. चौ. उ. म. विद्यापीठाच्या संघातून सहभागी झाली होती. स्पर्धेत उत्कृष्ट कामगिरीच्या आधारे तिने रजत पदक प्राप्त केले.
रिंकी पावरा विद्यापीठ स्तराच्या माध्यमातून मागील तीन वर्षांपासून दोनदा वर्ल्ड युनिव्हर्सिटी गेम्स मध्ये सहभागी झालेली आहे तसेच अखिल भारतीय विद्यापीठ स्पर्धा खेलो इंडिया आणि अश्रमे स्पर्धेत विविध पदक प्राप्त केलेले आहेत धडगाव सारख्या अतिदुर्गम भागातून येणारी रिंकी पावरा मेहनत आणि चिकाटीच्या जोरावर जागतिक स्तरापर्यंत पोहोचली आहे.
रिंकी पावराच्या खेलो इंडिया अंतर विद्यापीठ स्पर्धेतील या यशाबद्दल नं. ता. वि. समितीचे चेअरमन तथा विधान परिषद सदस्य चंद्रकांत रघुवंशी, नं. ता. वि. समितीचे व्हाईस चेअरमन मनोज रघुवंशी, महाविद्यालयाचे प्राचार्य तथा कवयित्री बहिणाबाई चौधरी उत्तर महाराष्ट्र विद्यापीठाचे व्यवस्थापन परिषद सदस्य प्रा. डॉ. एम.जे. रघुवंशी, संस्थेचे समन्वयक डॉ. एम. एस. रघुवंशी, महाविद्यालयाचे उपप्राचार्य डॉ. एस. पी. पाटील यांनी अभिनंदन केले आणि भविष्याच्या वाटचालीसाठी सदिच्छा व्यक्त केल्या, तसेच जी. टी. पाटील महाविद्यालयाच्या प्राध्यापक आणि प्राध्यापकेतर कर्मचारी यांनीही देव चव्हाणला शुभेच्छा दिल्या. रिंकीला महाविद्यालयाचे क्रीडा संचालक डॉ. टी. एल. दास यांचे मार्गदर्शन लाभले.