*अविष्कार 2026 –शताब्दी इन्स्टिट्यूट ऑफ फार्मसी, बामडोद येथील संशोधनाधिष्ठित कार्यक्रम यशस्वीरीत्या संपन्न*
नंदुरबार(प्रतिनिधी):-शताब्दी इन्स्टिट्यूट ऑफ फार्मसी, बामडोद, नंदुरबार येथे “अविष्कार 2026” या शैक्षणिक व संशोधनाधिष्ठित प्रकल्प सादरीकरण कार्यक्रमाचे भव्य आयोजन करण्यात आले. एकूण 28 विद्यार्थ्यांनी पोस्टर प्रेझेंटेशनच्या माध्यमातून आपले नाविन्यपूर्ण प्रकल्प सादर करत उत्स्फूर्त सहभाग नोंदवला. कार्यक्रमाचे उद्घाटन महाविद्यालयाचे प्राचार्य डॉ. पंकज एम. चौधरी यांच्या हस्ते झाले. विद्यार्थ्यांनी संशोधनाच्या दिशेने पाऊल टाकावे, नवसंकल्पना विकसित कराव्यात आणि वैज्ञानिक दृष्टी वाढवावी यासाठी अविष्कारसारख्या उपक्रमांची गरज असल्याचे त्यांनी आपल्या भाषणात सांगितले. या कार्यक्रमाचे संयोजक भुषण टी. गोपाळ तर महिला समन्वयक म्हणून सौ. ताश्विता पी. मगरे यांनी काम पाहिले. विद्यार्थ्यांनी सादर केलेल्या प्रकल्पांचे परीक्षण आणि गुणांकन ज्यूरी सदस्य रोहित एन. पाटील आणि सौ. कल्याणी डी. जावरे यांनी केले. विद्यार्थ्यांनी औषधनिर्मिती, वैद्यकीय विज्ञान, शुद्ध विज्ञान, जैविक तंत्रज्ञान, पर्यावरण व आरोग्य विषयक संशोधन विचार मांडत वैज्ञानिक पद्धतीने प्रेझेंटेशन सादर केले.
स्पर्धेमध्ये मेडिसिनल अँड फार्मसी विभागात कावेरी किशोर पावरा यांनी प्रथम क्रमांक तर हेमांगी किशोर सोनवणे यांनी द्वितीय क्रमांक पटकावला. शुद्ध विज्ञान विभागात अंकित विजय सोनवणे यांनी प्रथम क्रमांक आणि यशराज योगेश परमार यांनी द्वितीय क्रमांक मिळवला. विद्यार्थ्यांनी सादर केलेल्या प्रकल्पांत संशोधनात्मक दृष्टिकोन, विषयातील अचूकता, समाजोपयोगी विचार व भविष्यातील व्यावहारिकता स्पष्टपणे दिसून आल्याचे परीक्षकांनी नमूद केले. या उपक्रमामुळे विद्यार्थ्यांना संशोधन, सादरीकरण, तांत्रिक माहिती संकलन आणि वैज्ञानिक विवेचनाची संधी मिळाल्याचे प्राचार्यांनी समाधान व्यक्त केले.
सादर केलेल्या कार्यक्रमाबाबत संस्थेच्या अध्यक्षा सौ. योगिता गणेश पाटील, सचिव गणेश गोविंद पाटील तसेच प्राचार्य डॉ. पंकज एम. चौधरी यांनी विशेष कौतुक केले व विद्यार्थ्यांचे अभिनंदन केले.
कार्यक्रमाच्या यशस्वी आयोजनासाठी महाविद्यालयातील प्राध्यापकवर्ग, तांत्रिक कर्मचारी, विद्यार्थी स्वयंसेवक आणि समन्वयक मंडळींनी परिश्रम घेतले. संपूर्ण कार्यक्रम विद्यार्थ्यांनी तयार केलेल्या सूत्रसंचालनातून सुंदररीत्या पार पडला. अविष्कार 2026 हा उपक्रम विद्यार्थ्यांच्या वैज्ञानिक जिज्ञासेला चालना देणारा ठरला असून पुढील वर्षांमध्ये हा उपक्रम अधिक व्यापक प्रमाणात राबवण्याचा संकल्प महाविद्यालयाने व्यक्त केला.