*नंदुरबार तालुक्यातील शनिमांडळ येथे शनी अमावस्या निमित्त शनी मंदिरात दर्शनासाठी भाविकांची गर्दी*
नंदूरबार(प्रतिनीधी):-नंदुरबार तालुक्यातील शनिमांडळ येथे शनी अमावस्या निमित्त परिसरातील हजारो भाविकांनी दर्शनाचा लाभ घेतला यावेळी तेल नारळाच्या अभिषेक करण्यात आला. मोठ्या प्रमाणात मंदिर परिसरात यात्रेचे स्वरूप प्राप्त झाले. नंदुरबार तालुक्यातील शनिमांडळ साडेसाती मुक्तीचे शनि तीर्थ आहे. यामुळे दर शनी अमावस्येला भाविकांची येथे मोठ्या संख्येने गर्दी होते. यावर्षीही हजारो भाविकांनी दर्शनासाठी रांग लावली होती. सकाळी दहा वाजेपासून अमावस्येला प्रारंभ झाला सुरुवातीला पोलीस अधीक्षक श्रवण कुमार दत्त यांनी आरती करून शनीचे दर्शन घेतले यानंतर माजी आमदार तथा शिवसेनेचे संपर्कप्रमुख चंद्रकांत रघुवंशी व उपमुख्य कार्यकारी अधिकारी प्रदीप पवार यांच्यासह अनेक भाविकांनी दर्शन घेतले. येथील देवस्थानाला ब गटाचा दर्जा प्राप्त झाल्याने मोठ्या प्रमाणावर सुख सुविधा मिळणार आहेत. यामुळे येथील शनी तीर्थ मंदिर परिसराच्या सौंदर्यात भर पडणार आहे अशी माहिती शनिश्वर विश्वस्त मंडळाचे सचिव संतोष पाटील व त्यांच्या विश्वस्तांनी दिली. आलेल्या भाविकांचे विश्वस्त मंडळाचे अध्यक्ष अरुण पाटील व उपाध्यक्ष डॉ. सयाजीराव मोरे यांनी स्वागत केले. यंदा भाविकांचा मोठा प्रतिसाद लाभला. भाविकांनी येथील मराठी शाळेत पिठलं भाकर महाप्रसादाच्या लाभ घेतला. याप्रसादाने भाविकांचे आजार दूर होत असल्याची श्रद्धा आहे. यामुळे भाविकांनी दरवर्षाप्रमाणे यावर्षी देखील महाप्रसादाच्या लाभ घेण्यासाठी गर्दी केली होती. शनि अमावस्या निमित्त बाहेरील पुरोहित मंडळी शनी अमावस्या निमित्त येत असतात. त्यांच्याकडून येणारे भाविक पूजा विधि करून आपला शनी ग्रह शांत करत असतात. यावर्षी भाविकांचा अधिक प्रतिसाद लाभल्याने नारळ आणि तेल विक्रीचा विक्रमी विक्री झाली. तसेच अमावस्या निमित्त भाविक हे आपली आडापिडा जावी म्हणून जुने पायदान चप्पल, बूट, सॅंडल शनी मंदिर आवारात सोडून जातात यामुळे परिसरात चप्पल बुटांचा ढीग साचला होता. नारळाच्या तुरटाच्या खच साचला  होता. मंदिर परिसरात मोठ्या प्रमाणावर महाप्रसाद, पूजा साहित्य, व खेळण्याची तसेच खाद्यपदार्थांची दुकाने लावण्यात आली होती यामुळे अनेकांना रोजगार मिळाला. सुट्टीचा दिवस असल्यामुळे कर्मचारी वर्गाने दर्शनासाठी हजेरी लावली.