*मोलगी–भगदरी रस्त्याच्या डांबरीकरणासाठी युवा क्रांतीचे निवेदन,काम सुरू न झाल्यास आंदोलनाचा इशारा*
अक्कलकुवा(प्रतिनिधी):-तालुक्यातील मोलगी ते भगदरी हा अत्यंत महत्त्वाचा मुख्य रस्ता असून या रस्त्याची अवस्था अत्यंत दयनीय झाल्याने तात्काळ नवीन डांबरीकरण करण्यात यावे, अशी मागणी युवा क्रांती सामाजिक संघटना, नंदुरबार यांच्या वतीने करण्यात आली आहे. याबाबत सार्वजनिक बांधकाम विभागाला निवेदन देण्यात आले असून सात दिवसांच्या आत प्रत्यक्ष दुरुस्तीचे काम सुरू न झाल्यास अक्कलकुवा तहसीलदार कार्यालयासमोर तीव्र आंदोलन छेडण्यात येईल, असा इशाराही संघटनेच्या वतीने देण्यात आला आहे.
मोलगी ते भगदरी हा रस्ता अनेक दुर्गम गावपाड्यांना जोडणारा प्रमुख दळणवळणाचा मार्ग आहे. तसेच नर्मदा काठावरील अनेक गावांतील नागरिकांना ये-जा करण्यासाठी हा एकमेव मार्ग असल्यामुळे या रस्त्यावरून दररोज मोठ्या प्रमाणात वाहतूक होत असते. परिसरातील असंख्य विद्यार्थी मोलगी येथे शाळा, महाविद्यालयात शिक्षणासाठी ये-जा करीत असतात. मोलगी हे गाव मुख्य बाजारपेठ असून येथे अनेक शासकीय कार्यालये कार्यरत आहेत. अलीकडेच मोलगी येथे अपर तहसील कार्यालय सुरू झाल्यामुळे प्रवाशांची संख्या देखील मोठ्या प्रमाणात वाढली आहे. दरम्यान या रस्त्यावरून रुग्णवाहिका, शासकीय वाहने तसेच इतर आपत्कालीन सेवा मोठ्या प्रमाणात सुरू असतात. गरोदर माता, रुग्ण तसेच नागरिकांना उपचारासाठी किंवा इतर कामासाठी या रस्त्याचा वापर करावा लागतो. मात्र सध्या रस्त्यावर मोठमोठे खड्डे पडल्याने वाहन चालविणे अत्यंत कठीण झाले असून अपघात होण्याची दाट शक्यता निर्माण झाली आहे. त्यामुळे केवळ खड्डे बुजवून काम भागणार नसून संपूर्ण रस्त्याचे नवीन डांबरीकरण करणे आवश्यक असल्याचे निवेदनात नमूद करण्यात आले आहे. सदर निवेदनाची प्रशासनाने तात्काळ दखल घेऊन मोलगी ते भगदरी या रस्त्याच्या दुरुस्तीचे काम सात दिवसांच्या आत सुरू करावे, अन्यथा अक्कलकुवा येथे तहसीलदार कार्यालयासमोर युवा क्रांती संघटना व स्थानिक नागरिकांच्या वतीने तीव्र आंदोलन छेडण्यात येईल, असा इशारा देण्यात आला आहे. यावेळी युवा क्रांतीचे प्रदेश सरचिटणीस अ‍ॅड. दिपक वसावे व जिल्हा उपप्रमुख डॉ. पंकज तडवी यांनी संबंधित विभागाला हे निवेदन सादर केले.