*अवैधरित्या वाळूची विक्री करण्याचे उद्देशाने विनापरवाना वाहतूक करणाऱ्याविरुध्द स्थानिक गुन्हे शाखेची कारवाई, 55 टन वाळू व वाहनासह एकूण 60 लाख 66 हजार रुपयांचा मुद्देमाल हस्तगत*
नंदुरबार(प्रतिनिधी):-28 नोव्हेंबर 2025 रोजी स्थानिक गुन्हे शाखेचे पोलीस निरीक्षक हेमंत पाटील यांना गोपनिय माहिती मिळाली की, नंदुरबार शहरात विनापरवाना अवैधरित्या वाळूची वाहतुक होत आहे, अशी खात्रीशीर माहितीवरुन जिल्हा पोलीस अधीक्षक श्रवण दत्त.एस यांच्या मार्गदर्शनाखाली स्था.गु.शा. प्रभारी हेमंत पाटील यांनी लागलीच पथकास कारवाईकामी रवाना केले. मिळालेल्या गोपनिय माहितीचे अनुषंगाने स्थानिक गुन्हे शाखेचे पथक नंदुरबार शहरातील धुळे चौफुली परिसरात हजर असतांना नवापुर चौफुलीकडे जाणारा एक पांढऱ्या रंगाचा हायवा ट्रक दिसला त्यावेळी पथकास मिळालेल्या गोपनिय माहितीची खात्री झाल्याने त्यांनी सदर ट्रकला दंडपाणेश्वर मंदिराचे जवळील परिसरात थांबवून त्यावरील वाहन क्रमांक पाहीला असता तो MH 41 AT 7473 असा असल्याचे समजले. सदर वाहनावरील वाहन चालकास त्याचे नाव गाव विचारता त्याने त्याचे नाव हिरालाल बापू खैरनार, वय 38 वर्षे, रा. वडेल, ता.मालेगाव, जि. नाशिक असे सांगितले. त्यास वाहनात काय असल्याचे विचारता त्याने वाळू असल्याचे सांगुन त्याबाबत कुठल्याही प्रकारची रॉयल्टी अगर परवाना नसल्याचे सांगितले तसेच वाळुची चोरुन वाहतुक करीत असल्याचे कबुल केले. सदर वाहनातुन एकुण 66,000 रुपये किमतीची 55 टन वाळू सह 60,00, 000 रुपये किमतीचे टाटा कंपनीचे पांढऱ्या रंगाचा हायवा ट्रक असा एकुण 60,66,000 रुपये किमतीचा मुद्देमाल हस्तगत करण्यात आला आहे. सदर वाहन हे पुढील कारवाईकामी नंदुरबार शहर पोलीस ठाणे येथे घेऊन येत असतांना वाहनचालकाने त्याचे GPS सिस्टीम बंद करुन सदर वाहन लॉक करुन शासकीय कामात अडथळा निर्माण केला म्हणुन वाहनचालक हिरालाल बापू खैरनार, वय 38 वर्षे, रा. वडेल, ता. मालेगाव, जि. नाशिक याच्या विरुध्द नंदुरबार शहर पोलीस ठाणे येथे गु.र.नं. 672/ 2025 भा. न्या. संहिता कलम 303 (2), 132 सह पर्यावरण संरक्षण कायदा कलम 3, 15 प्रमाणे गुन्हा दाखल करण्यात आला आहे. "तरी अशाप्रकारे जिल्हा हद्दीत कुठल्याही प्रकारचे अवैध व्यवसाय व त्याची चोरटी वाहतूक करणा-यांविरुध्द यापुढे देखील कडक कायदेशीर कारवाई केली जाणार असल्याचे, जिल्हा पोलीस अधीक्षक श्रवण दत्त. एस यांनी यावेळी स्पष्ट केले आहे." सदरची कामगिरी पोलीस अधीक्षक श्रवण दत्त. एस, अपर पोलीस अधीक्षक आशित कांबळे, यांच्या मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील, पोउपनि मुकेश पवार, विकास गुंजाळ, पोहेकॉ सुनिल येलवे, दिनेश चित्ते, ज्ञानेश्वर पाटील, दादा वाघ, दादाभाई मासुळ यांनी केली आहे.